तातोपानी नाका हानं चालीगु संकेत

येँ – वंगु २०७२ सालया तःभुखाय् लिपा बन्द जुयाच्वंगु चीन व नेपाःया खासा सीमा नाका आः हानं चायेकीगु सम्भावना खने दयावःगु खँ धाःगु दु । चीनया खासा जुयाः नेपाःया तातोपानी जुकः वइगु थ्व नाका हानं चायेकेगु बारे चीनं नेपाःयात आः तक औपचारिक जानकारी छ्वया महःनिसां थौंकन्हय् चीनं तातोपानी दुहां वयेगु खासाया सतक धमाधम दयेका हःगु कारणं थ्व नाका हानं चालेत्यंगु अनुमान स्थानीय मनूतय्सं याना हःगु खः।

चीनं थौंकन्हय् खासाया लार्चा धाःगु थासय् स्यनाच्वंगु लँ दयेकेगुया नापनापं सामान तइगु सुख्खा बन्दरगाह समेत तीव्र गतिं दयेकाच्वंगु दु । चीनं थःगु लागाय् थ्व निर्माण यानाच्वंगु खनाः उगु लागां निर्वाचित सांसद अग्नी सापकोटां नं उकुन्हु अन वनाः निरीक्षण यानादीगु खः । चीनं थःगु लागाय् लँ व सुख्खा बन्दरगाह दयेकाच्वंगुलिं आः तातोपानी नाका हानं चायेकीगु अनुमान अप्वया वःगु खँ वय्कलं नं कनादिल ।

तर नेपाःयात धाःसा थुकिया औपचारिक जानकारी आः तक वःगु मदुनि । तःभुखाचं चलः वनाः लँ पूरा हे स्यंगुलिं तातोपानी भन्सार नं बन्द जूवंगु खः । वयां लिपा चीनं थ्व भन्सार हानं चायेकेगु संकेत मक्यंगुलिं नेपाःया व्यापारीतय्सं चीनं हयेमाःगु सामान फुक्क केरुङ व भारतया कोलकाता जुयाः हयेगु यानाच्वंगु खः । थ्व नाका चाल धाःसा चिनियाँ सामान हयेत अःपुइगु खँ धाःगु दु ।