फोहर विसर्जनस्थल पहिचान
येँ – येँ महानगरपालिकां बर्खाया ई उकिसनं वा वयाच्वनीगु इलय् महानगर लागाया फोहर व्यवस्थापनया निंतिं स्थान पहिचान याःगु दु । येँ मनपां थौंकन्हय् फोहर व्यवस्थापन याना वयाच्वंगु नुवाकोट जिल्ला सिसडोल ल्याण्डफिल साइट फोहरं जायेधुंकूगुलिं वा वइगु इलय् संकलन जुइगु फोहर व्यवस्थापनया निंतिं स्थान पहिचान याःगु खः ।
मेमेगु इलय् स्वयां थ्व इलय् फोहरया मात्रा अप्वइगुलिं मेगु थाय् पहिचान यायेमाःगु येँ मनपां न्ह्यथंगु दु । येँ मनपा वातावरण विभागया प्रमुख हरिकुमार श्रेष्ठं बर्खा व वा वइगु मौसमया इलय् फोहर व्यवस्थापन यायेत ककनी गाउँपालिका २ लय् च्वंगु भिलेज एक व भिलेज २या करिब १५ रोपनी खाली जग्गा स्थान पहिचान यानाः फोहर व्यवस्थापन यायेत तयार यायेधुंगु जानकारी बियादिल ।
विभागया प्रमुखसहितया छगू पुचलं थ्व इलय् संकलन जुइगु फोहर व्यवस्थापन यायेगु थाय्या स्थलगत निरीक्षण नं यायेधुंकूगु दु । विभागलिसें वातावरण व्यवस्थापन समितिया पदाधिकारी फोहरया अन्तिम व्यवस्थापन व निर्माणाधीन स्थलया अवलोकन याःगु खः ।
थ्व स्वयां न्ह्यः सिसडोलय् फोहर व्यवस्थापन याना वयाच्वंगु खःसा आः अन फोहर व्यवस्थापन यायेगु सम्भव मजुइवं उगु हे थासं करिब २ गू किलोमीटर च्वय् लाःगु बञ्चरेडाँडाय् फोहर व्यवस्थापन यायेगु तयारी याना वयाच्वंगु दु । बञ्चरेडाँडा तक वनेगु लँ निर्माणया क्रमय् दुगु व सिसडोलय् नं फोहर वांछ्वयेगु स्थिति मदयेवं बर्खाया इलय् फोहर वायेगु निंतिं उगु थाय् क्वःछिनागु विभागया प्रमुख श्रेष्ठं कनादिल ।
निदँया निंतिं फोहर व्यवस्थापन यायेगु धासें वंगु झिंस्वदँ न्ह्यवंनिसें सिसडोलय् फोहर वांछ्वया वयाच्वंगु खः । क्वःछिनातःगु ई स्वयां अप्वः फोहर व्यवस्थापन याना वयाच्वंगुलिं उगु थाय् हे धरापय् लाइगु स्थिति वयेवं बञ्चरेडाँडाय् फोहर व्यवस्थापन याइगु जूगु दु । सिसडोलय् ताःईतक फोहर वांछ्वया वयाच्वंगुलिं थःपिंत समस्या जूगु स्थानीतय्सं धया वयाच्वंगु खः ।
थ्व हे झ्वलय् बञ्चरेडाँडाय् निर्माण जुयाच्वंगु ल्याण्डफिल साइटया पूर्वाधार फक्व याकनं क्वचायेकेत सम्बन्धित पक्षयात इनाप याःगु दु ।
निदँया निंतिं धाःसां नं सिसडोलय् वंगु झिंस्वदँ न्ह्यवंनिसें स्वनिगःया १८ गू स्थानीय तहया फोहर व्यवस्थापन याना वयाच्वंगु खः । स्वनिगःया दक्वं नगरपालिकाय् उत्पादन जुइगु फोहरमध्ये ७५ प्रतिशतं मल्याक फोहर सिसडोलय् हे व्यवस्थापन याना वयाच्वंगु खः ।
LEAVE YOUR COMMENTS