बल थ्वानाः डंगोलपाखें विश्व कीर्तिमान

येँ (नेपालभाषा टाइम्स)- घौछिया दुने ९२१८ क्वः तुतिं बल थ्वानाः नेपाःया सजन डंगोलं गिनिज बुक अफ वल्र्ड रेकर्डय् कीर्तिमान तयादीगु दु । वय्कलं वंगु १६ फेब्रुअरी २०२४ स बेलायतया बर्मिङघमय् उगु रेकर्ड तयादीगु खः ।

२०६५ सालं व्यवसायिक फुटबल म्हितेगु ज्या न्ह्याकूम्ह वय्कलं प्रारम्भिक चरणय् यु–१४ राष्ट्रिय कासाय् फ्रेन्ड्स क्लब कुपण्डोलं म्हितादीगु खःसा सी डिभिजन लिग भगवती क्लब, बी डिभिजन लिग बाँसबारी क्लब व ए डिभिजन लिग बिग्रेड ब्याइज क्लबं म्हितादीगु खः । लिसें वय्कलं स्वनिगःया थीथी नांजाःगु क्लबं थःगु प्रतिभा क्यनादीधुंकूगु दु ।

लिपांगु इलय् बेलायतय् च्वना वयाच्वंम्ह वय्कलं अन नं फुटबल कासाय् सक्रिय जुयाच्वनादीगु दु । सन् २०२१ स बर्मिङ्घम टाइगरय् आवद्ध जुयाः फुटबल कासाय् म्हितादीगु खःसा वंगु दँय् सी डी प्रेस क्लबं स्थानीय लिगय् ब्वति कयादीगु खः ।