
यल – यल महानगरपालिका अन्तर्गत लाःगु सामुदायिक व संस्थागत फुक्क हे स्कुलय् नेपालभाषा ब्वंकेगु निंतिं यल महानगरपालिकां नं तयारी शुरु याःगु दु । थुकिया लागिं पाठ्यक्रम तयार यायेत महानगरपालिकापाखें छगू कमिटी गठन याःगु दु । यल महानगरपालिका शिक्षा विभागया प्रमुख महेन्द्र बहादुर क्षेत्रीया संयोजकत्वय् दयेकूगु थ्व कमिटीं पाठयक्रम व पाठ्य सफू तयार याइगु खँ धाःगु दु ।
कमिटीइ तुलसीलाल सिंह सह संयोजककथं दुथ्याकूगु दुसा दुजलय् सविना महर्जन, एलिना महर्जन, दिपक तुलाधर, जीवनकुमार महर्जन व नवराज रिजाल दुथ्याः ।
यल महानगरपालिकां आः वइगु शैक्षिक दँनिसें छगू निसें स्वंगू तगिं तक स्थानीय विषय कथं नेपालभाषाया माध्यमं ब्वंकेगु तयारी यानाच्वंगु दु । सहसंयोजक सिंहं यलय् नर्सरी कक्षां निसें हे नेपालभाषा ब्वंकेगु निंतिं पाठ्यसफू तयार याइगु जानकारी बियादीगु दु ।
यल महानगरपालिकाया नगर सभां यल महानगरपालिका अन्तर्गतया सामुदायिक व निजी स्कुलय् स्थानीय पाठय्क्रम नेपालभाषाया माध्यमं ब्वंकेगु धकाः निर्णय पारित याना तयेधुंकूगु दु ।
नेपालभाषाया माध्यमं स्थानीय विषय ब्वंकेगु ज्या येँ महानगरपालिकां थगुनेनिसें शुरु याःगु खःसा आः किपू नगरपालिकाय् नं छगूनिसें स्वंगू तगिं तक ब्वंकेगु शुरु यायेधुंकूगु दु ।
LEAVE YOUR COMMENTS