नुवाकोटय् सिन्दुर जात्रा तःजिक हन

नुवाकोट (रासस)÷ नुवाकोटया भैरवी देगलय् न्यायेकीगु सिन्दुर जात्रा तःजिक हंगु दु । विदूर नपा ५ या देवीघाटं न्हिनय् हःगु भैरवी द्यःयात देगलय् दुतिकाः जात्रा क्वचायेकूगु खः । ल्हुति पुन्हि निसें मू जात्रा कथं हनीगु सिन्दुर जात्रा त्रिशुली जिल्लाया हे दकलय् ताःहाकःगु जात्रा खः । पुन्हिया झिंन्यान्हु न्हयवनिसें हे जात्राया थीथी ज्या न्ह्याइ । चतुर्दशी कुन्हु भैरवी देगः न्ह्यः यःसिं थनेवं जात्राया रौनक सुरु जुइ ।
पुन्हि कुन्हु देवीघाटया जालपादेवी पीठय् खटय् तयाः यंकूगु भैरवी द्यःयात द्वितीया कुन्हु लित हयाः सिन्दुर जात्रा न्यायेकीगु खः । सिन्दुर जात्रा लिपा भैरवी देगः न्ह्यःने धामीं बलि कायेवं जात्रा क्वचाइगु खँ द्वारे महेन्द्रकुमार शाहीं कनादीगु दु ।
जात्राया झ्वलय् नुवाकोटया दरबार क्षेत्रया भैरवी देगः व देवीघाटया जालपा द्यःयाथाय् द्यइके वःपिनि भीड जूगु खः । चतुर्दशी कुन्हु दरबारया राष्ट्रिय संग्रहालय लिक्क लाःगु भैरवी द्यःयाथाय् जुइगु सिन्दुरे जात्राया पाहाँ ब्वनेत केँहेँम्ह भैरवी तताम्ह जालपादेवीयात सःतेत वंगु बाखं दु । किवंदन्ती कथं तताम्ह जालपादेवीलिसें भैरवी द्यः देगलय् लिहां वयेवं लसतां सिन्दुर जात्रा न्यायेकीगु खः ।
जालपादेवीं लिहां वःम्ह धामी स्थानीय धरमपानीया फल्चां बाजंसहित भैरवी देगः न्ह्यःने थ्यनेवं सिन्दूर जात्रा याइ । भैरवी देगलं बाजं व सैनिक टुकडीसहित सिन्दुर जात्रा यानाः तलेजु भवानीया देगलय् खः दुतयंकी ।
सिन्दुर जात्रा पूवंक क्वचाइगु धाःसा दशमी कुन्हु जक जुइगु खँ द्वारे शाहीं कनादीगु दु । जात्राया झ्वलय् यायेमाःगु थीथी विधि व पुजा सिन्दुर जात्रा क्वचायेधुंकाः यायेमाःगुलिं दशमी कुन्हु जक सिन्दुर जात्राया औपचारिक रुपं क्वचाइगु खँ धाःगु दु ।
नुवकोटया मू जात्रा जूगुलिं थुकिया धार्मिक व सांस्कृतिक महत्व दु धासें प्रदेशं हे थ्व नखःयात मू नखः कथं कायेमाःगु नुवाकोट सरोकार समाजया सचिव अनुजकुमार श्रेष्ठं धयादीगु दु ।
थ्व जात्रा मू यानाः थनया नेवाः समुदायं तःजिक न्यायेकी । थ्व नखःबलय् थनया नेवाःतय्सं थःथितियात नखत्या सःतेगु याइ ।
थुगुसीया जात्रा स्वयेत प्रदेश नं. ३ या सभामुख सानुकुमार श्रेष्ठ, उपसभामुख राधिका तामांग, येँ महानगरपालिकाया मेयर विद्यासुन्दर शाक्यपिं नुवाकोट थ्यंगु खः ।