क्वन्ति महाद्यःया देगः दनेगु सिधइन

यल (नेपालभाषा टाइम्स) – क्वन्ति महाद्यःया देगः जिर्णोद्वार व पुनःनिर्माण यायेगु ज्यां तीव्रता काःगु दु। यल लाय् कुलिं उत्तरपाखे च्वंगु क्वन्ति महाद्यः पुनः निर्माण व जिर्णोद्वार यायेगु झ्वलय् प्यतँ सिधःगु दु ।

२०७२ बैशाख १२ गतेया तःभुखाचं क्षति जूगु न्यातँ जाःगु देगःया स्वतः पूर्ण रुपं थुनाः पुनःनिर्माण याःगु खःसा नितँ जीर्ण जूगुलिं जिर्णोद्वार यायेगु ज्या जुयाच्वंगु दु। देगःया गजुलिं क्वय् स्वतँ पुनःनिर्माण व अनं क्वय् छतँ जिर्णोद्वार यायेगु ज्या क्वचाःगु दु। देगः पुनःनिर्माण व जिर्णोद्वारया ठेक्का काःगु धर्मेश तुलसी ड्रामा जेभीया दिनेश श्रेष्ठं आः दकलय् क्वय्या छतँ जक ज्या याये ल्यं दुगु जानकारी बियादिल ।

भुखाय् ब्वःगु दछि लिपा २०७३ साल निसें देगः पुनःनिर्माणया ज्या न्ह्या:गु खःसां नं इलय् व्यलय् थीथी समस्याया कारणं गति काये मफयाच्वंगु खः । थगुने मंसिरनिसें बांलाक ज्या शुरु जुइवं वयां छुं ई लिपा हे कोरोना संक्रमणयात ध्यानय् तयाः लकडाउनया कारणं ज्याय् हाकनं समस्या वःगु खः ।

देगःया ज्याय् छुं ई ढिलासुस्ती जूसां नं आः धाःसा बांलाक ज्या न्ह्यानाच्वंगु व देगःया आवश्यक छुं भचा सिँया अभाव जूगुलिं ज्या लिबानाच्वंगु वय् कलं धयादिल । वय्कःया धापूकथं सिँ दत धाःसा थ्व हे लछिया दुने सिधयेकेगु कथं ज्या जुयाच्वंगु दु। देगःया निंतिं आवश्यक अग्राथया सिँ दत धाःसा बाःछिया दुने लगभग दक्वं ज्या क्वचायेके फइगु खँ धाःगु दु। न्यातँजाःगु देगःया प्यतँ तकया पल्लिइ सिजःया पौ चीगु ज्या नं क्वचायेधुंकूगु दु ।

पुरातत्व विभागलिसें निर्माण कम्पनीं निगू करोड ८५ गू लाखय् देगःया ठेक्का काःगु खः । देगः पुनःनिर्माणया ठेक्का सम्झौताय् देगलय् लुँया जलप तयेगु सम्बन्धी छुं नं खँ उल्लेख मजुयाच्वंगुलिं गजूलिसें दक्वं तल्लाय् तयातःगु पाताय् लुँया जलप तयेत हाकनं दाता माले मालीगु अवस्था दुगु देगःया मूल पुजारी माधवश्याम शर्मां कनादिल ।

कोभिडया संक्रमण न्यना वने न्ह्यः छवाःयंकं हे न्हिथं म्वःम्वः भक्तजनत क्वन्ति महाद्यःलिसें बगलामुखी द्यःया दर्शन यायेत वइगु खः । थुगु देगलय् कुम्भेश्वर व सर्वेश्वर महाद्यःया निगू मूर्ति दु ।

सम्बन्धित बुखँ

LEAVE YOUR COMMENTS