सम्पदा पुनःनिर्माण तीव्र गतिइ

येँ (नेपालभाषा टाइम्स) – थनिं न्यादँ न्ह्यःया भुखाचं क्षति जूगु स्वनिगःया ऐतिहासिक, धार्मिक व पुरातात्विक महत्वया सम्पदा पुनःनिर्माणं गति काःगु दु। २०७२ साल बैशाख १२ गते गोरखाया बारपाक केन्द्र विन्दु जुयाः ब्वःगु भुखाचं पूर्णरुपं क्षति जूगु अज्याःगु सम्पदा पुनःनिर्माणं गति काःगु खः ।

सम्पदा पुनःनिर्माणया झ्वलय् छुं छुं सम्पदाया पुनःनिर्माण सिधयेधुंकूगु दु, छुं छुं सम्पदा लिपांगु चरणय् थ्यनाच्वंगु दु। अथे हे छुं सम्पदा पुनःनिर्माणं गति काःगु दु। दरवार हाईस्कुल पुनःनिर्माण सिधयेधुंकूगु दु, वया न्ह्यःनेसं च्वंगु रानीपुखूगु पुनःनिर्माण लिपांगु चरणय् थ्यनेधुंकूगु दु। अथे हे मरुसतःलिसें धरहरा पुनःनिर्माणं गति काःगु दु ।

पुनःनिर्माण सिधःगु, लिपांगु चरणय् थ्यंगु व गति कयाच्वंगु सम्पदामध्ये धरहरा छगू जक पुलांगु अवशेषयात कायम हे यानाः न्हूगु निर्माण यायेगु ज्या जुयाच्वंगु खःसा मेगु दक्वंया पुनःनिर्माण हे जुयाच्वंगु दु। दरवार हाइस्कुल पुनःनिर्माण सिधःसां कोरोना महामारीया कारणं हस्तान्तरण यायेगु ज्या अलमल जुयाच्वंगु खः । चीन सरकारया ग्वाहालिइ पुनःनिर्माण जूगु हाइस्कुल थगुने माघ महिनाय् सिधःगु खःसा वंगु भदौया लिपांगु वालय् चिनिया निर्माण कम्पनीं विद्यालय व्यवस्थापन समितियात ताःचा लःल्हाःगु खः ।

रानीपुखूया पुनःनिर्माण सिधयेकाः नं लः जायेकेगु ज्या क्वचायेधुंकूगु दु। राष्ट्रिय पुनःनिर्माण प्राधिकरणयाकथं रानीपुखुलिइ आतक २ गू करोड ५० गू लाख लिटरं मल्याक लः क्वफायेधुंकूगु दुसा अझ ८० गू लाख लिटर लः तयेगु तयारी जुयाच्वंगु दु। पुखूया ज्यालिसें दथुइ च्वंगु बालगोपालेश्वर देगः नं पुनःनिर्माण क्वचायेकाः गजू छुइगु ज्या नं जुइधुंकूगु दु। थुगु देगः भुखाय् ब्वये न्ह्यः गुम्बज शैलीं दयेकातःगु खःसा आः पुनःनिर्माणया झ्वलय् पुलांगु हे ग्रन्थकूट (शिखरशैलीं) निर्माण याःगु दु ।