ग्वलया नागिंचा प्याखंयात येँ मनपाया ग्वाहालि

येँ (नेपालभाषा टाइम्स) – येँ महानगरपालिकां स्वनिगःया दकलय् पुलांगु बस्ती ग्वलया ऐतिहासिक नागिंचा प्याखंयात ग्वाहालि याइगु जूगु दु। स्वंगू शताब्दी स्वयां पुलांगु थ्व प्याखं वंगु न्हय्दँ न्ह्यवंनिसें आर्थिक समस्याया कारणं दिनाच्वंगु खः ।

येँ मनपां स्थानीय शाक्य समुदायं हुलीगु नागिंचा प्याखं निरन्तर न्ह्याकेया आर्थिक ग्वाहालि यायेत्यंगु खः । न्हय्दँ न्ह्यवंनिसें दिनाच्वंगु थ्व प्याखं न्ह्याकेत स्थानीय संस्कृतिविद् जलद वैद्य व परमानन्द शाक्यं विशेष कुतः यानादीगु खः ।

ऐतिहासिक, सांस्कृतिक व धार्मिक महत्वया प्याखं दिनाच्वंगुलिं थुकियात निरन्तरता बीगु निंतिं यानागु कुतः कथं येँ महानगरपालिकां ग्वाहालि यायेत्यंगु स्थानीय संस्कृतिविद् वैद्यं ‘नेपालभाषा टाइम्स’ यात कनादिल ।

वय्कलं कनादीकथं येँ मनपां न्हय्दँतक दिनाच्वंगु थ्व प्याखं संचालन यायेत थुगुसी ग्वाहालि यायेत्यंगु खःसा वइगु दिनय् नं निरन्तर रुपय् ग्वाहालि यायेगु ल्याखं खँ जुयाच्वंगु नं जानकारी बियादिल ।

वय्कलं बियादीगु जानकारीकथं थुगु प्याखनय् महाद्यः, पार्वती व सतीदेवी यानाः स्वम्ह कलाकार दइ । अथे हे करिब झिंखुम्ह वाद्यवादन पुचः व म्येँ हालीपिं न्याम्ह, खुम्ह दइ ।

यँयाःया इलय् क्यनीगु थ्व प्याखं स्वन्हुतक क्यनेगु याइगु खःसा प्याखं क्यनेत खुगू लाख तका खर्च जुइ । आर्थिक समस्यां यानाः प्याखं क्यनेत थाकुइवं पशुपति क्षेत्र विकास कोषयात ग्वाहालिया निंतिं इनाप याःगु खःसां कोषं ग्वाहालि यायेत अस्वीकार यायेवं प्याखं दिउगु वैद्यं कनादिल ।

थुगु प्याखं न्ह्याकेत जयबागेश्वरीस्थित अमालकोट कचहरीं फै बलि बीमाः । फै बलि बियाः नासःद्यःया पुजा यानाः थ्व प्याखं क्यनेगु चलन दु। थ्व प्याखं न्हापांगु न्हिकुन्हु जयबागेश्वरीं शुरु जुयाः पशुपति बासुकीपट्ट चोक, पशुपतिया प्रांगण, भुवनेश्वरीया प्रांगण, पशुपति अमालकोट कचहरी चोक, जयबागेश्वरी द्यःया मन्दिर प्रांगणय् प्याखं क्यनाः वैद्य चुकय् थ्यंकाः क्वचायेकी ।

अथे हे निन्हुया न्हिकुन्हु पशुपतिया प्यम्ह पुजारीया निवास, राम मन्दिर, गोरखनाथ, गुह्येश्वरी, जयबागेश्वरी, नवालि त्वाः जुयाः वैद्य चुकय् प्याखं हुइकी । दकलय् लिपा चाबही बहाः व चाबही गणेद्यःयाथाय् क्यनी ।

२०५७ सालतक ग्वल देशय् संचालन जुइगु सकतां जात्रापर्वया निंतिं माःगु खर्च व्यवस्थापन अमालकोट कचहरीं हे याना वयाच्वंगु खःसा वयां लिपा कचहरी, पशुपति तहबिल, जगबागेश्वरी भण्डार कोषया स्वामित्वय् वनेवं जात्रा पर्व संचालनय् समस्या वःगु खः ।

सम्बन्धित बुखँ

LEAVE YOUR COMMENTS