ने. सं. ११४६ बछलागा पञ्चमी -

सुविसुया ज्याकू मिं नल

येँ – इन्टरनेट व केबुल टेलिभिजन सेवा प्रदायक कम्पनी सुविसुया ज्याकू म्हिगः मिं नःगु दु । बालुवाटारय् च्वंगु सुविसुया मू सर्भर दुगु भवनय् म्हिगः न्हिनय् १ बजे मिं नःगु खः । जेनेरेटर सञ्चालनया निंतिं माःगु इन्धन भण्डारण याइगु क्वथा मिं नयेगु शुरु जूगु खँ महानगरीय प्रहरी परिसर येँनं धाःगु दु ।

मि स्यायेगु निंतिं नेपाल प्रहरी, नेपाली सेना, जुद्ध बारुण यन्त्र वयाः नं मि स्याये मफुगु खः । पेट्रोलियम पदार्थ च्याःगु जूगुलिं मि स्यायेत थाकुगु खःसा वयां लिपा त्रिभुवन विमानस्थलया दमकल हयाः तिनि न्हिनय् २ बजे न्हिनय् मि स्याये फुगु खः ।

मि स्याये मफुतले बालुवाटार लागाय् यातायात बन्द याना बिउगु खः । सुविसु भवन मिं नयेवं सुविसुया स्वनिगःन्यंकंया इन्टरनेट सेवा प्रभावित जूगु दुसा कम्पनीं फयांफछि याकनं सेवा सुचारु यायेगु खँ धाःगु दु ।