कन्हय् राष्ट्रिय विभूति शंखधर साख्वाः दिवस

येँ – नेपाल संवत्या प्रवर्तक शंखधर साख्वाः–यात सरकारं राष्ट्रिय विभूति घोषणा याःगु न्हिया लुमंतिइ कन्हय् शंखधर दिवस हनीगु जूगु दु । शंखधर दिवसया लसताय् कन्हय् सथय् थनया लखुतीर्थय् शंखधरया लुमंतिइ छगू विशेष ज्याझ्वः याइगु जूगु दु । राष्ट्रिय न्हूदँ समारोह समितिया इनापय् स्थानीय खलः पुचःतय्सं उगु ज्याझ्वः यायेत्यंगु खः ।

अथे हे कन्हय् न्हिनय् थनया शंखधर पार्क (पुलांगु रत्न पार्क) दुने पलिस्था यानातःगु शंखधर साख्वाःया झ्वाता क्वय् नं विशेष ज्याझ्वः याइगु जूगु दु । उगु ज्याझ्वः लिपा सनिलय् शंखधरया झ्वाता जःखः मत च्याकाः दीपावली याइगु नं ज्याझ्वः दु ।

थ्वहे झ्वलय् नेपाल संवत्या न्हूदँ ११४२ क्यंगु लसताय् नेवाः स्यनामितय्सं शंखधर पार्कय् थौं भिंतुना कालबिल ज्याझ्वः याइगु जूगु दु । येँ महानगरपालिकां ब्वंकेगु शुरु याःगु स्थानीय पाठ्यक्रम ब्वंकीपिं स्यनामितय्सं उगु ज्याझ्वः ग्वसाः ग्वःगु खः । ज्याझ्वलय् येँ मनपाया मेयर विद्यासुन्दर शाक्य मूपाहां कथं झायादी ।

शंखधर दिवसया लसताय् स्वनिगःया मेमेगु नं थीथी थासय् ज्याझ्वः यायेगु चलन जुयाच्वंगु दु ।

सम्बन्धित बुखँ

LEAVE YOUR COMMENTS