ख्वप नगरपालिकाया झिंन्याक्वःगु नगरसभा जुल
ख्वप(नेपालभाषा टाइम्स)÷ ख्वप नगरपालिकाया झिंन्याक्वःगु नगरसभा ख्वप इन्जिनियरिङ्ग कलेज लिबालिबिइ जूगु दु । नगर प्रमुख सुनिल प्रजापतिया सभापतित्वय् जूगु नगर सभां ख्वप नगरपालिकापाखें संचालन यानाच्वंगु ख्वप कलेज अफ इन्जिनियरिङ २०६५ व ख्वप कलेज अफ ल २०८० या विनियम संशोधन सर्वसम्मपति पारित याःगु खः ।
नगरसभाया उलेज्या छगू ज्याझ्वःया दथुइ नेपाल मजदुर किसान पार्टीया केन्द्रीय सचिव सांसद प्रेम सुवालं यानादीगु खः । वय्कलं प्रधानमन्त्री व मन्त्रीत दूरदर्शी मजूगु कारणं देशय् स्वयां अप्वः विदेशय् वनाः ज्या यायेगु चलन नेपाली ल्याय्म्हतय्के अप्वःगु कनादिसें भारतया आँड भरोसाय् च्वनीपिं नेतात दत्तलय् देसय् आत्मनिर्भर अर्थतन्त्रया विकास याके मबिइगु खँ कनादिल ।
नेमकिपाया केन्द्रीय सदस्य व बागमती प्रदेशया सांसद सुरेन्द्रराज गोसाईनं थः च्वनागु थाय्यात हे विश्वया उत्कृष्ट थाय् यायेगु ज्याय् सकलें नेपाःमित जानाः न्ह्यचिलेमाःगु कनादिसें देय्यात भूटानीकरण, सिक्किमीकरण व गाजाकरण यायेत्यंगुया विरोध यायेमाःगु खँ कनादिल । मेम्ह नेमकिपाया केन्द्रीय सदस्य व बागमती प्रदेशया सांसद सृजना सैंजूं संघीयता घागो जुयाच्वंगु न्ह्यथनादिसें स्थानीय तहयात सक्षम यानाः ज्या याये मफुतल विदेशय् आखः ब्वनेत वनीपिं विद्यार्थीपाखें जक दँय् ३८ अर्ब नेपाली ध्यबा पिने वनीगु पने मफइगु खँ कुलादिल ।
ख्वप नगरपालिकाया मेयर सुनिल प्रजापतिं सभापतिया थासं बार्षिक प्रतिवेदन नं न्यंकादीगु ज्याझ्वलय् ख्वपया प्रमुख जिल्ला अधिकारी रोशनी कुमारी श्रेष्ठं ख्वप देय् चिधंगु जिल्लाया चिधंगु नगर जूसां नमूना नगर जूगु कनादिल । ख्वप नगरपालिकाया उपमेयर रजनी जोशीं लसकुस याना सुरु जूगु नगरसभा उलेज्या समारोहय् ख्वप नगरपालिकाया कार्यकारी अधिकृत बसन्त भट्टराईनं सुभाय् देछानादीगु खःसा ज्याझ्वः ९ वडा अध्यक्ष रविन्द्र ज्याख्वालं न्ह्याकादीगु खः । नगरसभां विधेयकत पारित याइगु ज्याझ्वः दु ।
LEAVE YOUR COMMENTS