बागमति प्रदेशय् सांसदयात भत्ता

येँ -संघीय सरकारं संघया सांसदपिंत मोहनि भत्ता मबिउसां बागमति प्रदेश सरकारं धाःसा सांसदपिंत मोहनि भत्ता बिउगु दु । प्रदेशया १०९ म्ह सांसदपिंत प्रदेश सभा सचिवालयं प्रदेशसभाया पदाधिकारी व दुजःपिंत भत्ता बिउगु खः । सांसद व प्रदेशसभा सचिवालययात यानाः मुक्क ५१ लाख १९ हजार तका मोहनि भत्ता बिउगु खः ।

प्रदेश सरकारं थुगुसी सांसदपिनि स्वकीय सचिवयात धाःसा भत्ता क्वःपाःगु दु । वंगु दँय् मोहनि भत्ता बापत प्रदेश सरकारं ८२ लाख ५० हजार तका मोहनि भत्ताय् खर्च याःगु खः । कोरोनाया कारणं संघीय सरकारं सरकारी खर्च कटौती यायेत मापदण्ड दयेकूगु खः । अथे खःसां नं बागमति प्रदेशं धाःसा प्रदेशसभाया पदाधिकारी व दुजः पिनिगु सेवा सुविधासम्बन्धी विधेयकय् न्ह्यथनातः कथं सभामुखयात ६१ हजार ४८०, उपसभामुख व प्रमुख प्रतिपक्ष दलया नेतायात ५८ हजार तका, समितिया सभापति व मुख्य, प्रमुख सचेतकयात ५६ हजार ८४० तका, सचेतकपिंत ५४ हजार ५२० तका सांसदपिंत ५२ हजार २ सय तका मोहनि भत्ता बिउगु खः ।

सभामुख सानुकुमार कथं प्रदेशसभां पारित याःगु सेवा सुविधा सम्बन्धी ऐन कथं भत्ता बियागु प्रतिक्रिया बियादीगु दु । वय्कलं प्रदेशसभां भत्ता मकायेगु धकाः निर्णय मयाःगुलिं फुकसितं भत्ता बियागु खँ धयादीगु दु । वंगु दँय् संघया लिसे प्रदेशया सांसदपिंत भत्ता बीगु खँय् ब्यापाक विरोध जुइवं सांसदपिंत भत्ता लित बिउगु खः । उकथं हे बागमति प्रदेशया छुं छुं सांसदपिंसं नं वंगु दँय् मोहनि भत्ता लित बिउगु खः । कोरोना महामारीया कारणं यानाः थःपिसं भत्ता कायेगु उचित मखु धासें भत्ता लित बिउगु खः ।

सम्बन्धित बुखँ

LEAVE YOUR COMMENTS