छाये चले मजूगु खः फेसबुक

एजेन्सी- सोमवाः बहनी निसें थ्यंमथ्यं खुघौ तक विश्वन्यंकं चले मजूगु कारण नेटवर्किङय् वःगु समस्या जूगु खँ धाःगु दु । फेसबुकं नेटवर्किङय् वःगु समस्याया कारणं फेसबुक लिसें ह्वाट्सएप व इन्स्टाग्राम चले मजूगु धासें माफि नं फ्वंगु दु ।

साइबर सुरक्षा विज्ञतय्सं नं प्रविधिइ खनेदुगु आन्तरिक समस्याया कारणं हे फेसबुक चले मजूगु तायेकूगु दु । तर अथे खःसां थ्व समस्या फेसबुक दुनेया सुं मनुखं सिर्जना याःगु नं खयेफु धाःगु दु । तर सुरक्षा विद्तय्सं बाह्य ह्याकरतय् धारणं धाःसा थ्व समस्या वःगुया सम्भावना म्हो हे जक दुगु खँ धाःगु दु ।

फेसबुकया प्रमुख प्रविधि अधिकृतं थःपिनि सेवा शतप्रतिशत संचालनय् वयेत अझं छुं ई काइतिनि धाःगु दु । फेसबुकया छु कारणं थज्याःगु समस्या वःगु धयागु धाःसा अझं स्पष्ट मजूनिगु खँ बिबिसीं धाःगु दु ।

फेसबुकय् वःगु थ्व आःतकया हे दकलय् तःधंगु समस्या जूगु खँ धाःगु दु । थज्याःगु समस्याया विवरण मुंकातइगु डाउनडिटेक्टरया कथं विश्वन्यंकंया छगू करोड खुगू लाख प्रयोगकर्तातय्सं फेसबुक चले मजूगु उजुरी बिउगु खः ।

सन् २०१९य् नं छक्वः फेसबुकय् थज्याःगु हे समस्या वःगु खः, उबलय् नं १४ घन्टां मल्याक फेसबुक चले मजूगु खः । मेखे फेसबुकय् समस्या खनेदयेवं थुकिया शेयरया भाः नं कुहां वंगु दु । न्यूयोर्कया शेयर बजारय् जक फेसबुकय् समस्या खनेदयेवं कम्पनीया शेयर भाः न्यागू प्रतिशत कुहां वंगु खः ।

 

सम्बन्धित बुखँ

LEAVE YOUR COMMENTS