नेपाः डिभिजन १य् थहां वन

सनसनीपूर्ण कासाय् क्यानाडायात १ विकेटं बुकल

येँ– सनसनपूर्ण कासाय् क्यानाडाविरुद्ध छगू विकेटं विजय चूलाकुसें नेपाः विश्व क्रिकेट लिगया डिभिजन १ य् थहां वंगु दु । थौं विजयया निंतिं करण केसी अस्वाभाविक रुपं नायक सावित जुल ।

४२.१ ओभरय् गुंगू विकेट वनेधुंकूगु अवस्थाय् नेपाः पराजय पाखे न्ह्याःवनेधुंकूगु खः । उबलय् तक नेपाःया निंतिं ५१ रनया आवश्यक दुगु खः । थज्याःगु अवस्थाय् क्रिजय् दुहां वःम्ह करण केसीं ३१ बलय् प्यंगू छक्का व स्वंगू चौका थ्वानाः ४२ रन दयेकेवं कासा नेपाःया पक्षय् वःगु खः । वयात अन्तिम ओभर तक साथ बिउम्ह बलर सन्दीप लामिछानें ५ रन दयेकूगु खः ।

अन्तिम ओभरया ६ बलय् नेपाःया विजयया निंतिं ८ रन आवश्यक दुगु खः । उबलय् क्यानाडाया बलर सेसिल परवेजं लगातार प्यंगू बल डट वांछ्वयेवं नेपाःयात हाकनं कासा त्याकेत थाकुगु अवस्था वःगु खः । तर न्यागूगु बलय् करणं छक्का थ्वायेवं हाकनं कासा नेपाःया पक्षय् वल । आः नेपाःया निंतिं अन्तिम बलय् २ रन आवश्यक जूगु खः । उबलय् दबाबय् लानाच्वम्ह बलर परवेजं वाइड वांछ्वयेवं कासा बराबरीया अवस्था वल । अन्तिम बलय् छगू रन आवश्यक खनेदत । केसीं थुकी १ रन थ्वानाबिल ।

थ्व कासा त्यायेवं नेपाः च्यागू ल्याः कयाः डिभिजन १ य् बढुवा जूगु दुसा सन् १०१९ य् जुइगु एकदिवसीय विश्वकप छनोट कासा नं म्हितेखनीगु जूगु दु । थ्व छनोट कासा वइगु महिनाय् जिम्बावेय् जुइ । अथेहे नेपाः आः निदँ तक जुइगु विश्व क्रिकेट लिग च्याम्पियनसिप व ४ दिवसीय महादेशीय कप म्हितेत नं योग्य जूगु दु ।

बुधवाःया कासाय् टस बुइवं न्हापां ब्याटिङ याःवःगु क्यानाडां निर्धारित ५० ओभरय् १९४ रन दयेकूगु खः, गुकी ओपनर श्रीमन्थ विजारत्नें अविजित १०३ रन दयेकल । लिसलय् ब्याटिङ याःवःगु नेपाःया प्रदर्शन धाःसा तसकं फ्यासुल । ओपनर ज्ञानेन्द्र मल्ल, कप्तान पारस खडका व शरद भेषवाकरया प्रदर्शन तसकं कमजोर जुल । कप्तान खडका ला शून्यय् आउट जूगु खः ।

तर ल्याय्म्हपिं कासामिपिंसं नेपाःयात विजयपाखे न्ह्याकल । ओपनर दिलिप नाथं ४१, आरिफ शेखं २६, रोहित पौडेलं २७ रन दयेकाः कासा त्याकेफइगु आशा जीवित यानातलसा करणं अन्तिम इलय् तक संघर्ष यानाः विजय चूलाकाबिल ।