लुँ काण्डय् एमालेया हंगामा

येँ (नेपालभाषा टाइम्स)- प्रमुख प्रतिपक्षी नेकपा एमालें लुँ तस्करी प्रकरणय् उच्चस्तरीय छानबिन समिति नीस्वनेमाःगु माग यासें म्हिगः प्रतिनिधिसभाया बैठकय् पंगः थंगु दु । लुँ तस्करीया ज्या सरकारया हे संरक्षणय् जूगु खः उकिं उकिया नितिं उच्चस्तरीय छानबिन समिति नीस्वनेमाः धासें एमालें वेल घेराउ याःगु खः ।

लिपांगु निला स्वलाया दुने २२ क्विन्टल स्वयां अप्वः लुँ गृहमन्त्री, अर्थमन्त्रीया संरक्षण व सेटिङय् दुहां वःगु व थ्व सामान्य विषय मखु धासें एमालेया प्रमुख सचेतक पद्म गिरीं लिपांगु इलय् सेटिङ स्यंगुलिं जक लुँ ज्वंगु खः धयादीगु दु । वय्कलं ३३ क्वः तक लुँ भन्सार जुयाः दुहां वःगु धासें थुकी मन्त्रींनिसें सु सु दुथ्याः छानबिन जुइमाःगु खँ नं धयादीगु दु ।

गिरीया धापू लिपा हे एमालेया सांसदतय्सं नाराबाजी यासें वेल घेराउ याःगु खः । सांसदतय्सं नाराबाजी यायेवं सभामुख देवराज घिमिरें वइगु साउन १५ गते तकया नितिं बैठक स्थगित याःगु दु ।

उकथं हे म्हिगः नेपाली कांग्रेसया सांसद सुनील शर्मां लुँ प्रकरणय् दुथ्याःपिं मू अभियुक्तयात मज्वन धाःसा थम्हं संसदय् हे आमरण अनसन च्वनेगु जुइ धकाः ख्याच्वः बियादीगु दु । प्रतिनिधिसभाया बैठकय् न्ववायेगु झ्वलय् शर्मां उगु ख्याच्वः बियादीगु खः । उकथं हे वय्कलं लुँ प्रकरणय् गृहमन्त्री नारायणकाजी श्रेष्ठ व अर्थमन्त्री प्रकाश शरण महतं नैतिकताया आधारय् राजीनामा बीमाःगु माग नं यानादीगु दु ।

अथे हे राष्ट्रिय स्वतन्त्र पार्टीया सभापति रवि लामिछानें क्विन्टल लुँ प्रकरणय् भन्सार प्रशासन व सुरक्षा निकायया प्रमुखयात बर्खास्त मयात धाःसा छानबिनय् समस्या वइगु खँ धयादीगु दु । लामिछाने तःधंगु काण्ड लिपा विषययात मत्थर यायेत कर्मचारी सरुवा यायेगु ज्या जुयाच्वंगु धासें उकियात कयाः विरोध प्वंकादीगु दु ।

वय्कलं लुँ तस्करीइ भरिया जक ज्वनेगु व नाइके ज्वने मफुगु घटनायात जनतां आश्चर्यया रुपय् मकायेधुंकूगु धासें कर्मचारीयात सरुवा यानाः कारबाही याःगु खः कि सिरपाः बिउगु खः धकाः न्ह्यसः नं न्यनादीगु दु ।