‘०१७ सालय् छाय् जनतां साथ मबिल ?’

येँ – नेकपा एमालेया अध्यक्ष केपी ओलीं मछिंगु इलय् सरकारयात जनतां तिबः मदइगु ख्याच्वः बियादीगु दु । म्हिगः अनेरास्ववियुया ज्याझ्वलय् न्ववासें अध्यक्ष ओलीं २०१७ सालय् पञ्चायती व्यवस्था शुरु जूगु इलय् जनतां तिबः मबिउगु धासें आः नं अज्याःगु ई वये फइगु ख्याच्वः बियादीगु खः ।

वय्कलं धयादिल, ‘जनता शान्तिपूर्ण रुपं म्वाये चाहे जू, जनतायात उकथं च्वने मबिल धाःसा प्रतिवाद यायेम्वाःला ? जनता कन्हय् प्रतिवादय् कुहां वयेगु, मछिंगु व प्रतिकुल परिस्थिति वल धाःसा सरकारयात जनतां साथ बीमखु, फुक्क सुम्क च्वनाः स्वया जक च्वनी, सत्र साल स्वःसा जिउ ।’

२०१७ सालय् नेपाली कांग्रेसया निगू तिहाइया सरकार व संसद जुजुं अपदस्थ याःगु इलय् नं सुनां नं न्वमवाःगु व सुइदँ तक पञ्यायती शासन न्ह्याःगु खँ धासें अध्यक्ष ओलीं लोकतन्त्र छुं मनूतय्त शासनय् थ्यंकेगु व जनताया झंगः लायेगु प्रणाली मखु धयादिल ।

वय्कलं सरकारं जनताया अधिकार सुरक्षा यायेमाःगु थासय् जनतायात दुःख बियाच्वंगु द्वपं नं बियादीगु दु । उकथं हे मेगु छगू ज्याझ्वलय् न्ववायेगु झ्वलय् वय्कलं प्रधानमन्त्री शेरबहादुर देउवां शपथ काःगु ७० न्हु दयेधुंकाः नं मन्त्रिपरिषद विस्तार मयासे देय्या मूवंगु ई बर्बाद याःगु द्वपं नं बियादीगु दु । मदुम्ह मदन भण्डारीया जीवनयात कयाः च्वयातःगु सफू विमोचन यायेगु ज्याझ्वलय् सम्बोधन यासें वय्कलं उगु खँ धयादीगु खः ।