ने. सं. ११४४ ञलाथ्व पुन्हि - येँया: पुन्हि

न्यकू बाजं व गुंला सम्बन्धी सफू पितब्वज्या

येँ- बाखं न्यने वा नांया संस्थापाखें नेवाः संस्कृति व परम्परा दुने अतिकं महत्वपूर्ण बाजंया रुपय् कयातःगु न्यकू व गुंला बाजं सम्बन्धी सफूया पितब्वज्या याःगु दु । वंगु शनिवाः थनया मरुत्वाःस्थित पीगंननिइ जूगु ज्याझ्वलय् येँ महानगरपालिकाया प्रमुख विद्यासुन्दर शाक्यं उगु सफू पितब्वज्या यानादीगु खः । ज्याझ्वलय् नवासें येँ महानगर प्रमुख शाक्यं भौतिक सांस्कृतिक सम्पदायात अभौतिक सम्पदां जीवन्त याना तइ धासें महानगरपालिकां राष्ट्रयापाखें मूर्त व अमूर्त सम्पदा संरक्षण व उकिया अस्तितव ल्यंका तयेया निंतिं लगानी याना वयाच्वंगु दु धयादिल ।

झी पुर्खातय्सं आपालं घटनाक्रमया बाखंत झीत कनातःगु व उकिया इतिहासया बारे झीत जानकारी दुसां गुकथ लिपिवद्ध याना यंकेगु धइगु खँ मसिउगुलिं थौं झीगु थःगु हे मौलिक सम्पदा बचे यायेत विदेशीतय् सफूयात लिधंसा कया वनाच्वनेमाःगु बाध्यात्मक अवस्था वयाच्वंगु दु धयादिल ।

‘नेपाःया आपालं संस्कृति, सम्पदाया फोटो कायेगुलिइ निषेध यानातःगु दु । संस्कार, विधि, प्रक्रिया बारे मेपिंत स्यनेकने याये मजिउ, गोप्य याना तयेगु याइ । व्यावहारिक रुपं थ्व बांलाःगु पक्ष खयेफु’, ‘महानगर प्रमुख शाक्यं धयादिल, ‘तर थन गोप्य धयातःगु किपा त हे विदेशीतय्सं पिकाइगु सफुतिइ पिहां वयाच्वनी, थन गोप्य धकाः झीत कना मतःगु बाखं हे विदेशी सफुतिइ पिहां वयाच्वनी ।’

‘थ्व गथे यानाः जुल । गुकथं जुल थज्याःगु खँय् झीगु ध्यान वनेमाःगु आवश्यक जू’ वय्कलं धयादिल । बागमति प्रदेशसभा सदस्य लिसें काष्ठमण्डप पुनःनिर्माण समितिया अध्यक्ष राजेश शाक्यं महानगरपालिकापाखें प्राप्त ११ गू करोड ५० गू लख आर्थिक अनुदान व समुदायपाखें प्राप्त सार्थक ग्वाहालिं मरुसतःया निर्माण लिपांगु चरणय् थ्यंगु खः धयादिल ।

पितब्वज्या जूगु सफूया समीक्षा यानादिसें संस्कृतिविद् प्रा. डा. चुन्दा वज्राचार्यं येँ महानगरं स्थानीय विषयवस्तु कःघानाः स्थानीय पाठ्यक्रम तयार यानाः नेपालभाषां ब्वकेगु ज्यायात कार्यान्वयन याःगु धइगु नं सांस्कृतिक संरक्षणया दृष्टिकोणं महत्वपूर्ण जू धयादिल । प्रज्वल शाक्यया सभापतित्वय् जूगु ज्याझ्वलय् एलिना ताम्राकार, अश्वेनवीर सिंह ताम्राकार, स्वतन्त्रत्रहादुर ताम्राकार लगायतं सफूया थीथी पक्षयात कयाः थःथःगु नुगःखँ तयादीगु खः ।