छाउनीइ सेनाया ३० गू हाइकेयरसहित १०० गू आइसोलेसन वार्ड

येँ (रासस) – नेपाली सेनां कोरोना भाइरस संक्रमित विरामीया उपचारया निंतिं हाइकेयरसहितया आइसोलेसन वार्ड दयेकीगु जूगु दु । छाउनीइ च्वंगु वीरेन्द्र सैनिक अस्पताल परिसर दुने सेनां कोरोनाया विरामी उपचार यायेत थ्व व्यवस्था याःगु खः ।

साधारण अवस्थाय् ओपिडी सेवा संचालन यायेगु निंतिं दयेकूगु जिओपिडी कम्प्लेक्सयात हे सेनां आइसोलेसन वार्डया रुपय् प्रयोगय् हःगु खः । थ्व कम्प्लेक्सय् ३० बेडया हाइकेयरसहित म्होतिं नं सछिगू आइसोलेसन तयारी अवस्थाय् दुगु खँ महासेनानी डा. श्रीजन मल्लं जानकारी बियादीगु दु । निगू युनिटय् १५÷१५ बेडया हाइकेयर युनिट तयेत्यंगुगु खः ।

आइसोलेसन कक्षा निर्माणया फुऽ तयारी अन्तिम चरणय् थ्यंगु दु । थुकिया ९० प्रतिशत निर्माण ज्या क्वचायेधुंकूगु दु । आइसोलेसन वार्डय् विरामीयात म्हो जक नापलाइकथं बेडया व्यवस्था याःगु दु । वार्डयात स्वंगू ब्वय् ब्वथःगु दु । न्हापांगु क्षेत्रय् कोरोनाया सम्भावित विरामीयात क्वारेन्टाइनय् तइ, विरामीया नमूना परीक्षण लिपा कोरोना मजूतले उगु थासय् तइ कोरोना संक्रमित पुष्टि जुइवं विरामीयात मेगु थासय् तयेयंकी । अथेहे सुं संक्रमिततयात हाइकेयरया आवश्यक जुल धाःसा हाइकेयर युनिटय् तयेयंकी । सिकिस्त विरामीतय्त अक्सिजनसहित चिकित्सकया निगरानीइ तइ ।

अथेहे सेनां छवाः दुने २० बेडया आइसियु नं दयेकेत्यंगु दु । सैनिक अस्पताल परिसरय् दुगु छगू भवनय् आइसियु दयेकेत्यंगु खः । सैनिक प्रवक्ता विज्ञानदेव पाण्डें आइसियु निर्माणया निंतिं निन्हु न्ह्यव हे टेन्डर जुइधुंकूगु जानकारी बियादीगु दु । छवाः दुने आइसियु तयार जुइगु वय्कःया धापू दु । आइसियुया निंतिं आवश्यक उपकरणया बन्दोवस्त जुइधुंकूगु दु । आइसियु दयेकेत सरकारं सेनायात १० करोड तका बिउगु खः । थुकी सेनां ७ करोड तका थप यानाः आइसियु दयेकेत्यंगु खः ।

मुख्यसचिव लोकदर्शन रेग्मी, प्रधानसेनापति पूर्णचन्द्र थापा, नेपाल प्रहरीया महानिरीक्षक ठाकुरप्रसाद ज्ञवाली, सशस्त्र प्रहरीया महानिरीक्षक शैलेन्द्र खनालपिंसं सेनां तयार यानाच्वंगु आइसोलेसन वार्डया निरीक्षण नं याःगु दु ।