रेडक्रसं स्थापना दिवस न्यायेकल

येँ – नेपाल रेडक्रस सोसाइटी (नेरेसों) थःगु ५७ क्वःगु स्थापना दिवस देय्न्यंकं थीथी ज्याझ्वः यासें न्यायेकल । ‘माया’ अर्थात मतिना धइगु मूल नारा बियाः केन्द्रीय ज्याकुथिइ न्यायेकूगु थुगुसीया रेडक्रसया स्थापना दिवस ज्याझ्वलय् केन्द्रीय अध्यक्ष संजीव थापां रेडक्रसया संस्थापक जाँ हेनरी ड्युनाया किपाय् माल्यार्पण यानादीगु खः ।

ज्याझ्वलय् नवासें अध्यक्ष थापां थुगुसीया नारां रेडक्रसप्रेमीतय्त छप्पँ यायेत ग्वाहालि यानाच्वंगु धयादिल । महामन्त्री देवरत्न धाख्वां दिवसया सान्दर्भिकताया बारे नुगःखँ तयादिसें नेपाल रेडक्रसयात सकसिगुं ग्वाहालि दयाच्वंगु व समुदायया माया मतिनां हे रेडक्रस न्ह्याः वने फयाच्वंगु विचाः तयादिल ।

ज्याझ्वलय् अन्तर्राष्ट्रिय रेडक्रस महासंघया नेपाल प्रमुख जुजा किम, रेडक्रसया अन्तर्राष्ट्रिय समिति आईसीआरसीया नेपाल सहयोग प्रमुख प्रमेश पौडेल, साझेदार राष्ट्रिय सोसाइटीपाखें क्यानेडियन रेडक्रसया नेपाल प्रमुख पिताम्बर अर्याल नेपाल रेडक्रसं याना वयाच्वंगु मानवीय ज्यायात कयाः च्वछायादीगु खः ।

रेडक्रस दिवसया लसताय् लाकाः जूगु किपा कासा, रेडक्रस कर्मचारी कल्याण कोषया संयोजनय् जूगु फुटबल, म्याराथन, चेस लगायत थीथी कासाय् विजयी जुयादीपिंत केन्द्रीय अध्यक्ष थापा व महामन्त्री धाख्वां सिरपाः व दसिपौ लःल्हानादीगु खः । थुकथं हे ज्याझ्वलय् रेडक्रसय् ज्या यानाच्वंपिं कर्मचारीतय् मस्तपाखे च्यागू तगिं व एसइइइ परीक्षा उत्तीर्ण जूपिंत नं महामन्त्री धाख्वां सिरपाः लःल्हानादीगु खःसा नीन्यादँ तक रेडक्रसय् निरन्तर सेवा बियादीपिं गुम्ह कर्मचारीयात नं सम्मान याःगु खः ।

अथे हे रेडक्रसया दिवसया हे लसताय् लाकाः केन्द्रीय ज्याकुथिइ जूगु हिदान ज्याझ्वलय् ४३ म्हेसिनं हिदान यानादीगु खःसा रेडक्रसया स्वयंसेवक व कर्मचारीतय् प्रतिभा प्रदर्शन व सांस्कृतिक ज्याझ्वः नं याःगु खः ।

थ्व हे झ्वलय् ५७ क्वःगु नेपाल रेडक्रस स्थापना दिवसया लसताय् लाकाः नेपाल रेडक्रस सोसाइटी गणबहाल उपशाखाया ग्वसालय् हिदान, जलपान व भेटघाट ज्याझ्वः जुल । ज्याझ्वलय् रेडक्रसकर्मि, शुभचिन्तक, भाषा, साहित्य, समाजसेवा लगायत थीथी ख्यःया व्यक्तित्वपिनिगु उपस्थिति दुगु खः ।

सम्बन्धित बुखँ

LEAVE YOUR COMMENTS