वरिष्ठ पत्रकार कोइराला प्रेस काउन्सिलय्
येँ – वरिष्ठ पत्रकार भारतदत्त कोइरालां नेपाल प्रेस काउन्सिलया अवलोकन भ्रमण यानादीगु दु । काउन्सिलया पुलांम्ह दुजःतकं जुयादीम्ह वरिष्ठ पत्रकार कोइरालां वंगु सोमवाः काउन्सिलया अवलोकन यानादीगु खः । प्रेस काउन्सिलया कार्यवाहक अध्यक्ष किशोर श्रेष्ठलिसे जूगु सहलहया इलय् वय्कलं संचारमाध्यमय पत्रकार आचारसंहिता कार्यान्वयनय् सहकार्य सम्बन्धी प्रस्ताव न्ह्याब्वयादिसें कोइरालां धयादिल, ‘देय् न्हूगु व्यवस्थाया चरणय् दु ।
संक्रमणकालीन अवस्थां पत्रकारिता ख्यः जक मखसे दक्वं ख्यलय् अस्तव्यस्त व अन्यौलता ब्वलनाच्वंगु दु । तर दक्षिण एशियाय् झीगु पत्रकारिता अप्वः सशक्त व सबल हे जू ।’पत्रकारिताय् शैक्षि ज्ञान प्राप्त जूगु पलायन जुयाच्वंगु खँय् दुःख प्वंकादिसें वय्कलं पत्रकारिता पेशायात मर्यादित व जिम्मेवार दयेकेया निंतिं छुं भचा चेतना ब्वलंकेत ‘मिडिया इथिक्स’ कार्यान्वयनय् हयेमाःगु आवश्यक जूगु खँय् बः बियादिसें नियन्त्रण याइपिं शासकत वल धाःसा भेनेजुएला व फिलिपिन्सया स्थिति वयेफु धयादिल ।
उगु इलय् काउन्सिलया कार्यवाहक अध्यक्ष श्रेष्ठं सीमित स्रोत–साधनं जित्तले व गात्तले आचारसंहिता जागरण सम्बन्धी सहलह, अन्तक्र्रियालिसें पत्रकारतय्त उपचारय् ग्वाहालि, उपकरण खरिदय् अनुदान बिया वयाच्वागु जानकारी बियादीगु खः । वय्कलं धयादिल, ‘संचारयात नियन्त्रण मखसे नैतिक बन्धनया आवश्यक दु, थःपिंसं सामाजिक संचालय् पत्रकारतय् गतिविधितकं अध्ययन याना वयाच्वनागु दु ।’
मिडिया काउन्सिल ऐन वयेत्यंगु जानकारी बियादिसें प्रेस पास बीगु व गम्भिर प्रकृतिया गल्ती यात धाःसा निलम्बन यायेगु अधिकार तक काउन्सिलयात दइगु कथं ऐनय् व्यवस्था जूसा उचित जुइगु राय वय्कलं बियादिल । रेडियो नेपालया न्हापांम्ह समाचारवातक, गोरखापत्र संस्थाया पूर्व सम्पादकलिसें पूर्व महाप्रबन्धक कोइरालाया हे कुतलय् नेपाल प्रेस इन्ष्टिच्युटया स्थापनालिसें पत्रकारिता विषयय् अनौपचारिक शिक्षाया शुरुवात नं जूगु खः ।
नेपाल पत्रकारिता, साहित्य व संचार कलाया सृजनात्मक ज्याय् प्यंगू दशक स्वयां अप्वः योगदान बियादीगु पात एशियाया नोबल पुरस्कारकथं कयातःगु रोमन म्यागसेसे पुरस्कार–२००२ पाखें नं सम्मानित जुयादी धुंकूगु दु ।
LEAVE YOUR COMMENTS