तीव्र गतिइ सवारी चले याइपिं होशियार

येँ-  न्हिनय् जक मखु चान्हसिया इलय् नं छिं तीव्र गतिं मोटरसाइकल ब्वाकेगु याना च्वनादीगु दुसा आः सावधान जुयादिसँ । महानगरीय ट्राफिक प्रहरी महाशाखां आवंलि बहनि वा चान्हसिया इलय् नं तीव्र गतिं सवारी चले याइपिंत कारवाही यायेगु अभियान न्ह्याकूगु दु ।

विशेष यानाः बहनि व चान्हय् सतक सुनसान जुइगु इलय् तीव्र गतिं मोटरसाइकल ब्वाकीपिंत लक्षित यानाः महाशाखां उकथंया कारवाही अभियान न्ह्याकूगु खः । बहनि सतक सुनसान जुइगु इलय् तीव्र गतिं सवारी साधन चले याइबलय् दुर्घटना अप्वयेफगु धासें महाशाखां ‘नाइट भिजन लेजर स्पिड गन’ प्रयोग यानाः सवारी गति जाच यायेगु अभियान न्ह्याकूगु खः ।

महाशाखाया प्रमुखलिसें प्रहरी वरिष्ठ उपरीक्षक जनक भट्टराईं लिपांगु इलय् तब्यागु सतक खण्डय् दुर्घटना जुइगु क्रम अप्वयाच्वंगु व थज्याःगु दुर्घटनाया प्रकृति स्वयेबलय् लँ खाली जुइगुलिं तीव्र गतिं मोटरसाइकल ब्वाकीपिं दुर्घटनाय् लानाच्वंगुलिं उकियात नियन्त्रण यायेकथं लेजर स्पिड गन प्रयोग यानाः थ्व अभियान न्ह्याकागु खः धयादिल ।

महाशाखायाकथं कोटेश्वर, सूर्यविनायक, चक्रपथ लागा, सतक तब्या जूगु थासय् थुगु अभियान न्ह्यकूगु खः । थ्व स्वयां न्ह्यः न्हिनसिया इलय् जक न्ह्याका च्वंगु थुकथंया लेजर स्पीड गन प्रयोगपाखें तीव्र गतिइ सवारी चले याइपिं स्वीप्य पीम्हेसित तक कारवाही याना वयाच्वनागु नं महाशाखां न्ह्यथंगु दु ।

न्हिनय् प्रभावकारी रुपं न्ह्यानाच्वंगु अभियानयात आः बहनि नं संचालन यानागु धासें महाशाखा प्रमुख भट्टराईं थुकिं तीव्र गतिं सवारी चले यायेगुयात नियन्त्रण याये फइगु नापं दुर्घटना नं म्हो यायेत ग्वाहालि जू वनीगु विश्वास प्वंकादिल ।

सम्बन्धित बुखँ

LEAVE YOUR COMMENTS