क्वपाःगु सार्वजनिक विदा थप जुइगु

येँ- सरकारं सार्वजनिक विदाया पुनरावलोकन यानाः नीखुन्हु सार्वजनिक विदा थप यायेगु तयारी यानाच्वंगु खँ सीदुगु दु ।
मन्त्रिपरिषदया बैठकं गृहमन्त्री रामबहादुर थापाया संयोजकत्वय् गठन याःगु विदा पुनरावलोकन समितिं नीखुन्हु विदा थप यायेत सिफारिस याःगु खँ विशेष सूत्र धाःगु दु ।

गृह मन्त्रालयया स्रोतया कथं म्हिगः च्वंगु समितिया बैठकं थ्व स्वयां न्ह्यः क्वपाःगु गुन्हु पुन्हिं, छठ, माघे संक्रान्ति, ल्होसार, इद, क्रिसमस थेंज्याःगु पर्वय् तकं पूर्ण विदा बीगु तयारी यानाच्वंगु दु ।

पुनरावलोकन समितिं थ्व स्वयां न्ह्यः सम्बन्धित जाति, वर्गायात बिया वयाच्वंगु पूर्ण विदा बीगु तयारी नं यानाच्वंगु खँ धाःगु दु ।
थ्व स्वयां न्ह्यः वंगु चैत्र १४ गते मन्त्रिपरिषदया बैठकं न्हापां निसें बिया वयाच्वंगु गणतन्त्र दिवस, प्रजातन्त्र दिवस, पृथ्वी जयन्ती, घटस्थापना, फूलपाती, कोजाग्रत पूर्णिमा, द्वादशी, रामनवमी, गुन्हु पुन्हिं, कृष्ण जन्माष्टमी, लोकतन्त्र दिवस व शहिद दिवसय् बिया वयाच्वंगु विदा क्वपाःगु खः ।

थीथी जाति समुदायया बियाच्वंगु विदा क्वपाले धुकां शनिवार ५२ व मेगु विदा १६ न्हु यानाः मुक्कं ६८ न्हिं जक विदा बिया वयाच्वंगु खः ।
सरकारं बिदा क्वपालेवं आदिवासी जनजातिया लिसें थीथी धार्मिक समुदायपिंसं बिदा क्वपाःगुयात कयाः विरोध याना वयाच्वंगु खः ।
समितिया सिफारिस लिपा सरकारं विदा घोषणा याइगु खँ धाःगु दु ।