फोहर लः प्रशोधन केन्द्रया निंतिं सहलह

यल – स्वनिगलय् फोहर लः प्रशोधन केन्द्र निर्माण यायेगु तयारी शुरु जूगु दु । स्वनिगःया स्वंगू थासय् फोहर लः प्रशोधन केन्द्र निर्माण जुइवं आः यलया सुन्दरीघाटय् नं उकथंया फोहर लः प्रशोधन केन्द्र निर्माणया निंतिं सहलह नं शुरु जूगु दु ।

काठमाडौं उपत्यका खानेपानी लिमिटेड अन्तर्गतया आयोजना कार्यान्वयन निर्देशनालयं फोहर लः प्रशोधन केन्द्र निर्माण लिपा फोहर लःयात व्यवस्थापन यायेगु व थनया खुसि सुचुकुचु यानातयेगु ल्याखं उकथंया प्रशोधन केन्द्र निर्माण यायेगु बारे सहलह शुरु याःगु खः ।

थ्व स्वयां न्ह्यः निर्देशनालयं गुह्येश्वरी, सल्लाघारी व बालकुमारिया कोड्कु खुसिइ उकथंया प्रशोधन केन्द्र निर्माण यायेधुंकूगु दु । थनिं बाःछि न्ह्यः प्रधानमन्त्री केपि शर्मा ओलीं कोड्कु खुसिया केन्द्रया उलेज्या यानादीगु खः ।

सहलहया इलय् यल महानगरपालिकाया प्रमुख चिरिबाबु महर्जनं सुन्दरीघाटय् केन्द्र निर्माणया निंतिं स्थानीवासी आतक नं सकारात्मक मजुयाच्वंगु खँय् चिउताः प्वंकादिल । फोहर लः प्रशोधन केन्द्रया निर्माणं उगु लागालिसें जःखः दुर्गन्ध न्यने फइगुलिं सहमत मजुयाच्वंगु
वय्कलं धयादिल ।