ने. सं. ११४६ अनलाथ्व पुन्हि -

१२ वडा भवनया शिलान्यास

येँ – येँ महानगरपालिकां वडावासी व सेवाग्राहीयात सुविधा सम्पन्न भवनपाखें सेवा बीगु ताःतयाः हाकनं छगू मेगु वडाया वडा भवन शिलान्यास याःगु दु । लिपांगु इलय् येँ महानगरपालिका वडा नं. १२या वडा भवन निर्माणया निंतिं शिलान्यास याःगु खः ।

टेकुया चल्खुस्थित पुलांगु वडा ज्याकू दुगु हे थासय् न्हूगु सुविधा सम्पन्न भवन निर्माण यायेगु ताः तयाः शिलान्यास याःगु खः । येँ महानगरपालिकाया प्रमुख विद्यासुन्दर शाक्यं वंगु बुधवाः पुलांगु वडा भवन दुगु थासय् परम्परागत रुपं पुजा यानाः भवनया शिलान्यास यानादीगु खः ।

महानगर प्रमुख शाक्यं १२ वडा भवन पचलि लागाय् दयेकेगु योजना दुगु खःसां क्यब व खुल्ला थाय्सहितया भवन दयेकेगु प्रस्तावयात कयाः छुं विवाद खने दयेवं उकिया पिपिउँ ई काःगु खँ कनादिल । उगु इलय् विवाद पिहां मवःगु खःसा आतकया दुने भवन निर्माण सम्पन्न जुयाः नं सेवा प्रवाह यायेगु ज्या शुरु जुइधुंकीगु वय्कःया धापू खः ।
थःपिं विवादय् तक्यनाच्वनेगु पलेसा पुलांगु हे थासय् वडा भवन निर्माण यायेगु निर्णयकथं १२ वडा भवनया शिलान्यास यानागु वय्कलं कनादिल ।

वडाअध्यक्ष विकास डंगोलं सहज सेवा प्रवाहया निंतिं सुविधा सम्पन्न भवन निर्माण महत्वपूर्ण जू धासें कुल लागत ४ गू करोड २५ गू लाख ३२,४४८ तका दामं भवन निर्माण यायेत्यनागु जानकारी नं बियादिल । ४ आना १ पैसा २ दाम क्षेत्रफलय् निर्माण जुइगु वडा भवन खुतँ जाः जुइ । भूमिगत पार्किङ, लिफ्ट सुविधा व अपांगमैत्रीलिसें ख्वीम्हेसिया क्षमता दुगु सभाकक्ष सहितया भवन निर्माण यायेत्यंगु खः ।

येँ महानगरपालिकाय् प्रमुख शाक्यया नेतृत्वय् जनप्रतिनिधि निर्वाचित जुया वयेधुंकाः च्वंगु कार्यपालिकाया न्हापांगु बैठकं महानगरया व्यवस्थित सेवा प्रवाहया निंतिं केन्द्र व वडाया थःगु हे भवन निर्माण यायेगु सर्वसम्मतं निर्णय याःगु खः ।

न्हापांगु बैठकया निर्णयकथं येँ महानगरपालिकां गुलिखे थासय् वडा भवन निर्माणया ज्या सम्पन्न यायेधुंकूगु दुसा गुलिखे वडाया भवन निर्माणाधीन अवस्थाय् दु । अथे हे मेमेगु वडाया भवन नं निर्माण यायेगु चरणय् वनाच्वंगु दु ।