‘लकडाउनय् स्वनिगः दुहांवइपिं अप्वल, कडाई यानादिसं’
- नेपालभाषा टाइम्स
- ११४० बछलाथ्व त्रयोदशी
- किपा-जीवनराम श्रेष्ठया फेसबुकपाखें
येँ – कोरोना भाइरस (काेभिड-१९) संक्रमणया कारणं देय् छगूलिं लकडाउनय् दु । तर छगू शहरं मेगू शहरय् वनीपिनि ल्याः धाःसा अझ नं म्हो जूगु मदुनी । छुं ई थुके स्वनिगलं पिने कोरोनाया संक्रमण तच्वयेवं स्वनिगः दुहांवइपिनि ल्याः नं अप्वःगु दु ।
स्वनिगलय् दुहांवइपिं अप्वयेवं थनया स्थानीय निकायया प्रमुखतय्सं स्वनिगः दुहांवइपिंत कडाई यायेत इनाप यानादीगु दु । मंगलवाः उपत्यका नगरपालिका फोरमं उपप्रधानमन्त्री नापं कोभिड-१९ उच्चस्तरीय समन्वय समितिया संयोजक ईश्वर पोखरेलयात नापलाना थज्याःगु इनाप यानादीगु खः ।
स्वनिगलं विद्यार्थी व मजदुरतय्त पिने छ्वयेगु व पिनेया जिल्लां थन मनूत छ्वयेगु होडबाजीं यानाः कोरोनाया संक्रमण झन् तच्वइगु खँ न्ह्यथंसें फोरमं तत्काल स्वनिगः दुहांवइपिंत कडाई यायेत इनाप यानादीगु खः । नापं स्वनिगः दुने अत्यावश्यक गाडीत बाहेक मेगू सवारी साधन वयेत कडाई यायेत नं सुझाव बिउगु खः ।
खँल्हाबंलाया झ्वलय् येँ महानगरपालिकाया मेयर नापं फोरमया अध्यक्ष विद्यासुन्दर शाक्यं स्वनिगः दुहांवइपिंत कडाई मयायेगु खःसा थन थप समस्या वयेफुगु खँय् बिचाः यायेमाःगु धयादीगु खः । वय्कलं स्वनिगः वयेगु नाकाया सुरक्षा व्यवस्था कडा यानाः स्वनिगः दुने लकडाउन छ्वलुकेमाःगु सुझाव नं बियादीगु खः ।
उगु इलय् समन्वय समितिया संयोजक पोखरेलं नगरपालिका फोरमं बिउगु सुझावयात मन्त्रीपरिषद्या मुँज्याय् यंकेगु व अनं आवश्यक निर्णय यायेगु जानकारी बियादिल । खँल्हाबंलाया झ्वलय् कामपया मेयर शाक्य नापं यल महानगरपालिकाया मयेर चिरिबाबु महर्जन, थिमि नगरपालिकाया मयेर मदनसुन्दर श्रेष्ठ नापं येँया सांसदत कृष्णगोपाल श्रेष्ठ व जीवनराम श्रेष्ठया नं ब्वति दुगु खः ।
LEAVE YOUR COMMENTS