पूर्ण मन्त्रिमण्डल वयेत अझं ई काइ

येँ – प्रधानमन्त्री शेरबहादुर देउवाया नेतृत्वय् नीस्वंगु सरकारया मन्त्रिमण्डलं पूर्णता कायेत अझ छुं ई काइगु सीदुगु दु । थौंकन्हय् कांग्रेस महाधिवेशनया नितिं केन्द्रीय कमिटीया बैठक च्वनाच्वंगु दुसा नकोप माओवादी केन्द्रया नं केन्द्रीय कमिटीया बैठक च्वनाच्वंगुलिं छुं ई लिपा जक मन्त्रिमण्डल विस्तार याये फइगु खँ धाःगु दु ।

उकथं हे जनता समाजवादी पार्टी (जसपा) या आधिकारिकता विवादयात कयाः सर्वोच्च अदालतय् महन्थ ठाकुर पक्षं पुनरावलोकन मुद्दा दर्ता यानातःगुलिं यानाः जसपां नं मन्त्रिमण्डलय् वनेत अदालतया निर्णय पियाच्वंगु खँ सीदुगु दु ।

सर्वोच्च अदालतं उपेन्द्र यादव पक्षयात आधिकारिकता बीवं थःपिनिगु राजनैतिक जीवन हे संकटय् लानाः अपूरणीय क्षति जुइ धासें ठाकुर पक्षं पुनरावलोकन याःगु खः । उगु मुद्दाया फैसला प्यन्हु न्यान्हु लिपा जक वइगु जुयाः मुद्दा क्वचायेकाः जक जसपा सरकारय् वनेगु खँ जसपाया नेता राजेन्द्र श्रेष्ठं ‘नेपालभाषा टाइम्स’ यात कनादीगु दु ।

मन्त्रिमण्डल विस्तार यायेत फुक्कं पार्टीयात छक्वलं दुकायेगु धकाः तयारी जुयाच्वंगुलिं नं तत्काल मन्त्रिमण्डल विस्तार जुइत समस्या जुयाच्वंगु खँ सीदुगु दु ।
गठबन्धन पार्टी दुने मन्त्री जुइत इच्छुक जुयाच्वंपिं सांसदत अप्वया वनाच्वंगु दुसा पार्टीया नेतृत्वयात सरकारय् सुयात छ्वयेगु धइगु बारे अझ नं स्पष्ट याये मफयाच्वंगुलिं नं मन्त्रिमण्डल विस्तार यायेत समस्या जुयाच्वंगु खँ धाःगु दु ।