सभामुख ल्ययेत त्रिपक्षीय विवाद

येँ – नेपाल कम्युनिष्ट पार्टीइ सभामुख सुयात दयेकेगु धइगु बारे शुरु जूगु विवाद आः वयाः अझ तच्वया वंगु खँ सीदुगु दु । वंगु पुस ४ गतेनिसें शुरु जूगु संघीय संसदया हिउँदे अधिवेशन सभामुख ल्यये मफयाः अनिर्णयया बन्दी जूगु दुसा म्हिगः नं सभामुख सुयात दयेकेगु धइगु बारे पार्टी दुने सहमति जुइ मफुगु खँ धाःगु दु ।

सूत्रया कथं सभामुखया निंतिं पार्टी दुने त्रिपक्षीय विवाद शुरु जुयाच्वंगु दु । पार्टीया अध्यक्ष लिसें प्रधानमन्त्री केपी शर्मा ओलीं पुलांम्ह सभामुख सुवास नेम्वाङयात हे सभामुख दयेकेमाः धकाः अडान कयाच्वंगु दुसा मेम्ह अध्यक्ष पुष्पकमल दाहालं पुलांम्ह सभामुख कृष्णबहादुर महरा पूर्व माओवादी जूगुलिं आः वय्कःया थासय् वइम्ह सभामुख नं पूर्व माओवादी हे जुइमाःगु अडान तयादीगु दु ।

मेखे राष्ट्रपति विद्यादेवी भण्डारीं धाःसा वर्तमान उपसभामुख शिवमाया तुम्बाहाम्फेयात सभामुख दयेकेमाः धकाः पार्टी अध्यक्ष लिसें प्रधानमन्त्री ओलीयात दबाब बियाच्वंगु दु । थुकिं यानाः सभामुख सुयात दयेकेगु धइगु सवालय् पार्टी दुने त्रिपक्षीय विवाद पिहां वयाच्वंगु दुसा थुकिं यानाः समस्यात झन स्वतुमतु स्वका बिउगु खँ धाःगु दु ।

पुलांम्ह सभामुख कृष्णबहादुर महरां बलात्कारया द्वपं लिपा राजीनामा बीधुंकाः उपसभामुख तुम्बाहाम्फें नं थःत हे सभामुख दयेकेमाः धकाः अडान कयाच्वंगु दु ।