थनिंनिसें निगूगु मात्राया खोप

येँ – कोरोना भाइरस विरुद्धया न्हापांगु मात्राया खोप कायेधुंकूपिंत आः निगूगु मात्राया खोप बीगु जूगु दु । कोरोना विरुद्ध भेरोसेलया न्हापांगु मात्रा काःपिंत निगूगु मात्राया खोप बीत्यंगु खः ।

थौं साउन २२ गतेनिसें भेरोसेलया न्हापां मात्रा कयेधुंकूपिंत निगूगु मात्राया खोप बीत्यंगु खः । विशेष यानाः न्हापांगु मात्राया खोप काःगु २१ न्हु पूवनेधुंकूपिंत निगूगु मात्राया खोप बीत्यंगु खः ।

जिल्ला स्वास्थ्य ज्याकू येँया प्रमुख बद्रीबहादुर खड्कां भेरोसेलया न्हापांगु मात्राया खोप काःगु २१ न्हु पूवनेधुंकूपिंत निगूगु मात्राया खोप बीगु जानकारी बियादिल । वय्कःया धापूकथं न्हापांगु खोप काःगु निश्चित अवधि पूवनेधुंकूपिं सकसितं येँया दक्वं पालिकाय् निगूगु मात्राया खोप बीगु निंतिं अभियान संचालन जुइ ।

थनिंनिसें न्ह्याइगु निगूगु मात्राया खोप अभियानय् छगू लख ख्वीन्याद्वः स्वयां अप्वंसिनं काइगु अनुमान याःगु दु । थ्व स्वयां न्ह्यः वंगु साउन १४ निसें १८ गतेतक छगू लख चय्द्वलं मल्याकयात भेरोसेलया न्हापांगु मात्राया खोप बिउगु खः ।

थ्व हे झ्वलय् अत्यावश्यक सेवाय् संलग्न जुयाच्वंपिनिगु निंतिं बिस्कं थासय् खोप केन्द्र तयाः अभियान संचालन याइगु जूगु दु । अज्याःपिं व्यक्तिया निंतिं त्रिवि शिक्षण अस्पताल महाराजगंज, प्रसूती गृह थापाथली, काठमाडौं मेडिकल कलेज सिनामंगल, निजामति कर्मचारी अस्पताल न्हू बानेश्वर, राधास्वामी आइसोलेसन सेन्टर सामाखुसिइ खोप केन्द्र संचालन यायेत्यंगु दुसा विदेश वनीपिनिगु निंतिं नेपाल प्रहरी अस्पताल व वीरेन्द्र सैनिक अस्पताय् खोप बीगु जूगु दु ।

सम्बन्धित बुखँ

LEAVE YOUR COMMENTS