त्रिचन्द्रय् चिट्या ब्यापार

येँ – थनया त्रिचन्द्र कलेजय् जुयाच्वंगु स्नात्तकोतर तहया परीक्षाय् चिट्या व्यापार जुयाच्वंगु दु । थ्व क्याम्पसय् जाँच बिउ वयाच्वंपिं विद्यार्थीतय्त जाँच हलय् थ्यंक हे चिट थ्यंकेगु ज्या जुयाच्वंगु दु । जाँच बिउवःम्ह विद्यार्थीं ग्वःकू धाल वःकू हे चिट बीगु व जाँच बियाः परीक्षा हलं पिहां वल कि ध्यबा कायेगु यानाच्वंगु दु ।

जाँच हलं पिहां वयेवं चिट काःम्ह विद्यार्थीयाके कलेज परिसरय् हे ध्यबा कायेगु याइ । आइतवाः थथे हे कलेज परिसरय् चिट्या ध्यबा कयाच्वंगु खंम्ह छम्ह प्रत्यक्षदर्शीं धाःकथं विद्यार्थीतय्सं नं बार्गेनिङ यानाः ध्यबा बीगु यानाच्वंगु दु । आइतवाः शिक्षा विषयया परीक्षाबलय् नं थथे हे खुलेआम चिट्या ध्यबा कायेगु ज्या यानाच्वंगु खः ।

प्रत्यक्षदर्शीं धाःकथं चिट् बिउपिंसं परीक्षा हलं पिहांवःलिसे चिट काःम्ह विद्यार्थीत सःताः छम्हेसिके झिंन्यासः–निद्वःया ल्याखं ध्यबा माल धयाच्वंगु खः । विद्यार्थीतय्सं नं थम्हं ग्वःकू चिट कयागु खः व ल्याखं न्यासः, द्वःछि जक ध्यबा बीगु यानाच्वंगु खः ।

थथे हे शिक्षा विषयया जाँच बियावःम्ह छम्ह विद्यार्थीं ‘जिं ला निकू जक चिट कयागु खः, उकिं न्यासः जक बी’ धयाच्वंगु खनागु उम्ह प्रत्यक्षदर्शीं कनादीगु दु । थथे चिट थ्यंकेगु ज्या यानाच्वंपिंसं थःपिंत विद्यार्थी युनियनया दुजः जूगु खँ नं धयाच्वंगु खः । उमिसं यदि पास यायेगु खःसा थःपिंसं मिले याना बीफु धकाः नं खुलेआम कनाच्वंगु खँ उम्ह प्रत्यक्षदर्शीं कंगु दु ।