प्रहरी हे टिकटकय् भुले जुयाः हैरान

येँ-थौंकन्हय् सामाजिक सञ्जालय् टिकटक दयेकाः क्यनेगु छगू तःधंगु लहर ब्वलनाच्वंगु दु । थुकी शिक्षक, डाक्टर, इन्जिनीयर, कर्मचारी आदि फुक्क हे पेशायापिं मनूत सक्रिय दु ।

थ्वहे झ्वलय् ओखलढुंगाय् धाःसा प्रहरीत तकं ड्यूटीइ च्वँच्वं टिकटक दयेकेगु ज्याय् अप्वः लगे जुयाच्वंगुलिं अनया जिल्ला प्रहरी कार्यालय हैरान जूगु दु । उकिं आः प्रहरीयात टिकटक दयेकाः मनोरञ्जनय् भुले जुयाच्वने दइ मखु धकाः अनया जिल्ला प्रहरी कार्यालयं निर्देशन हे जारी याःगु दु ।

जिल्ला प्रहरी कार्यालयया प्रमुख गोविन्दराज काफ्लें प्रहरी कर्मचारीतय्त सामाजिक सञ्जालय् टिकटक दयेकाः न्ह्यइपुका च्वनेगु ज्या मयायेत कडा निर्देशन बियादीगु दु ।

गुलिखे प्रहरीत ड्यूटीइ च्वँच्वं हे टिकटक दयेकाच्वनीगु जूगुलिं आः प्रहरीतय्सं ड्यूटीइ च्वनेबलय् जक मखु ड्यूटीइ मदइबलय् तक लाक्वपाक्व सामग्री पोष्ट मयासे समाजय् सकारात्मक सन्देश बीगु व सामाजिक हित जुइगु सामग्री जक पोष्ट यायेमाः धकाः नं वय्कलं निर्देशन बियादीगु दु । अन प्रहरी कर्मचारीतय्सं पालना यायेमाःगु आचार संहिता समेत जारी याःगु दु ।

सम्बन्धित बुखँ

LEAVE YOUR COMMENTS