गुथि विधेयकया औचित्य मदु : सत्यमोहन जोशी

किपू – वाङ्मय शताब्दी पुरुष सत्यमोहन जोशीयात म्हिगः किपुली छगू ज्याझ्वः यासें हंगु दु । वय्कः सछिदँ क्यंगु लसताय् उगु हनेज्या जूगु खः । सत्यमोहन हना खलःया ग्वसालय् जूगु ज्याझ्वलय् शताब्दी पुरुष जोशीयात मूपाहां सांसद राजन केसीं हनादीगु खः ।

हना खलःया संयोजक श्रीराम महर्जनया सभापतित्वय् जूगु ज्याझ्वलय् न्ववासें भाजु जोशीं सरकारं आः हःगु विधेयकया औचित्य मदु धासें उकियात लित कायेमाः धयादिल । लिसें वय्कलं सरकारं बियाच्वंगु समृद्ध नेपाः सुखी नेपाःमिया नारा सार्थक यायेगु खःसा दकलय् न्हापां भाषा, साहित्य व देशय् दुगु विविधतायात स्वीकार यायेमाःगु खँ नं कनादिल ।

वय्कलं आर्थिक रुपं सक्षम जुइवं समृद्ध नेपाः जुइ मखु धासें उकिया निंतिं भाषिक, साहित्यक व जातीय विविधता नं समृद्धि जुइमाः धयादिल । वय्कःयात किपू ध्वाखांनिसें बास लायाः लसकुस यासें ज्याझ्वः जूगु थासय् तक यंकूगु खः ।