नेपालभाषां कामशास्त्रया सफू
येँ – नेपालभाषा साहित्य ख्यलय् न्हापांखुशी कामशास्त्र बिषयया सफू पिदंगु दु । ईलोहं प्रकाशन प्रा लिया लुखाँ पिंदंगु नागरसर्वस्व दर्शनवीर शाक्यं च्वयादीगु खः । सिलौटी रिसोर्टय् प्रदेश नं ३या सांसद डा अजय क्रान्ति शाक्य, नेपालभाषा केन्द्रीय विभागया उपप्राध्यापक बज्रमुनी बज्राचार्य व ईलोहं प्रकाशन प्रालिया प्रबन्ध निर्देशक नरेशवीर शाक्यं थुगु सफू मंकाःकथं बिमोचन यानादीगु खः ।
उपप्रा वज्राचार्यं कामशास्त्र धायेवं हे यौन शिक्षा धकाः संकुचित बिचारधारा लुइगु खँ नागरसर्वस्व सफूतिं परिवर्तन याइगु बिचाः प्वंकादील । सफूतिइ कोथा वास्तुकला निंसें शरीरयात श्रृंगार यायेगु, आयुर्वेदया ज्ञान इत्यादी लिसें जीवनया पक्ष कामशास्त्रलिसे स्वानाच्वंगु खँ कुलादील ।
ईलोहं प्रकाशन प्रालिया प्रबन्ध निर्देशक नरेशवीर शाक्यं थुकथंया आपलं ग्रन्थ नेपालभासा ख्यलय् दुसां अध्ययन व विश्लेषण मजूनीगु तर आ धाःसा शुरुवात जूगु खँ कुलादील । अथे हे प्रदेश नं ३या सांसद डा. अजय क्रान्ति शाक्यं नेपालभासाया हे समाजया हे छगू बिषयलय् अध्ययन न्ह्याकदीगु खँ कुला दिल ।
लिसें डा. शाक्यं कला व साहित्य क्षेत्रया विकासया निंतिं थःम्हं फुचाःगु कुतः यायेगु प्रतिवद्धता नं प्वंका दिल । ईलोहं प्रकाशनया पिथना पेजथ्री बाःछिपौया ग्वसालय् नेसं ११३७य् जूगु पेजथ्री नेपालभासा पिपल्स च्वइस अवार्ड ११३७या समापन नं याःगु खः ।
बिशेषत ज्याझ्वः सुथांलाक्क न्ह्याकेत ग्वाहालिमिपिंत माननीय डा. अजय क्रान्ति शाक्यं सुभाय् पौ, नेसं ११३८या चीहाः संकिपा कासाय् ल्यू लाःगु शर्ट्फिल्म द मिथ ०या कलाकार एवं प्राविधिक व ग्वाहलिमिपिंत नं मतिनाया चिं लःल्हाःगु खः। नरेशवीर शाक्यया निर्माणय् तयार जूगु थुगु शर्ट्फिल्म दर्शनवीर शाक्यं निर्देशन यानदीगु खः ।
प्याखनय् राजेन्द्रमान शाक्य, रुपेन थक्वाः, आराध्यालक्ष्मी खड्गी व बिराजकाजी राजोपाध्यायया मू भुमिका दु। नागरसर्वस्व सफूया च्वमि दर्शनवीर शाक्यं नेपालभासा स्नातकत्तोर यानागु इलय् अभिलेख सम्पादनया पेपरकथं नागरसर्वस्व ग्रन्थ सम्पादन यानागु खँ न्ह्यथनादिल ।
सफूया रुपय् पितब्युगु थुगु ब्वय् कामशास्त्रं न्ह्यथना तःगु कथं श्रंगार, नस्वाः, आयुर्वेदया थी थी वासःया मात्रा दुगु ल्याखँ थौंया इलय् नं तसकं सान्दर्भिक व आर्थिक रुपं मनूतय्त सक्षम याये फइगु खँ न्ह्यथना दिल । लिसें कामशास्त्र धायेवं मात्र मिसा व मिजं दथुया शारीरिक स्वापूतिइ केन्द्र जूगु शास्त्र मखुसे मानव सभ्यता लिसे स्वानाच्वंगु शास्त्रया रुपय् नालेमाःगु खँ कनादिल ।
LEAVE YOUR COMMENTS