नेपाःया प्राचीन लिपिया वर्णमाला

येँ – नेपाःगाःया लिच्छविकालीन शिलापत्रय् छ्यलातःगु प्राचीन लिपिया नं वर्णमाला पिहां वःगु दु । थ्याका रिसर्च सेन्टरपाखें पिथंगु ‘प्राचीन लिपि वर्णमाला’ नांया थ्व महत्वपूर्ण सफू लिपि विशेषज्ञ रविसन शाक्यं तयार यानादीगु खः ।

थ्व सफुतिइ वय्कलं नेपाःया प्राचीन लिपियात कम्प्युटर आखः दयेकाः तयार यानादीगु खः । थुकी नेपाःया तताजि प्राचीन लिपित मध्ये ब्राम्ही, पूर्व लिच्छवि, उत्तर लिच्छवि व सिद्धम् लिपियात छथासं दुथ्याकादीगु दु ।

थ्व वर्णमालाय् मा–आखः, बा–आखः च्वयेगु विधि लगायत ईकथं आखःग्वलय् वःगु हिउपाः, आकार, उकार, एकार चिंकेगु विधि व शिलापत्र अनुसार उकी खने दया वःगु भिन्नतायात समेत उलेगु कुतः यानागु खँ लिपिविद् शाक्यं कनादिल । अथेहे अङ्क, थीथी चिन्ह व सम्बन्धित शिलापत्रया किपा तयाः उकिया लिप्यान्तर नं सफुती बियागु दु ।
थ्व सफू विशेष यानाः प्राचीन लिपि सकेत इच्छुकपिं न्हूगु पुस्ताया अनुसन्धानकर्ता व विद्यार्थीपिनि लागिं उपयोगी जुइगु खँ धाःगु दु ।

थौंकन्हय् त्रिभुवन विश्वविद्यालय अन्तर्गत संस्कृति व पुरातत्व विषयया स्नातकोत्तर तगिमय् नेपाल लिपि, रञ्जना लिपि लिसें प्राचीन लिपि नं ब्वनेमाःगु कोर्श तयातःगु दु ।

सम्बन्धित बुखँ

LEAVE YOUR COMMENTS