कोरोनाया स्वंगूगु लहर वयेफुगु खतरा

येँ – स्वास्थ्य तथा जनसंख्या मन्त्रालयं कोरोना भाइरसया स्वंगूगु लहर वये फइगु खँ धासें सचेत याःगु दु । म्हिगः मन्त्रालयया सहप्रवक्ता डा. समिरकुमार अधिकारीं छगू प्रेस विज्ञप्ति हे पिकासें उगु ख्याच्वः बियादीगु खः ।

विज्ञप्तिइ धयातःगु दु, ‘थौंकन्हय् न्यासः स्वयां अप्वः सक्रिय संक्रमित दुगु जिल्ला येँ, यल, ख्वप, मोरङ, सुनसरी, झापा, चितवन, कास्की, रुपन्देही व कैलाली खः । अथे हे निसः स्वयां अप्वः सक्रिय संक्रमित दुगु जिल्ला २२ गू स्वयां अप्वः दु । उकथं संक्रमितया जोखिम अप्वया वनाच्वंगुलिं संक्रमण पनेगु निंतिं संवेदनशील जुयाः जनस्वास्थ्यया मापदण्ड पालना यायेत इनाप यानाच्वना ।’

विज्ञप्तिइ निषेधाज्ञा छ्वासुके धुंकाः जनस्वास्थ्यया मापदण्ड पालना मयायेगु ज्यां गम्भीर लिच्वःलाके फइगु खँ धासें नेपालय् नं स्वंगूगु लहर वये फइगु जुयाः स्वास्थ्य संस्थाय् अक्सिजन, बेडया लिसें माःगु सेवा चुस्त दुरुस्त याना तयेत नं इनाप यानातःगु दु ।

थ्वहे झ्वलय् म्हिगः जक देय्न्यंकं १८५५ म्हेसित कोरोना संक्रमित जूगु दु । स्वास्थ्य तथा जनसंख्या मन्त्रालयया कथं ९१२२ म्हेसिया पीसीआर परीक्षण याःगु खः । उकथं हे एन्टिजेन विधिपाखें ३७०७ म्हेसिया परीक्षण याःगु खःसा उकी ८५९ म्हेसित कोरोना पोजिटिभ खनेदुगु दु । थुकिया लिसें नेपालय् कोरोना भाइरस संक्रमित जूपिनिगु ल्याः ६ लाख ७४ हजार ७२६ म्ह थ्यंगु दु । म्हिगः जक १२८८ म्ह संक्रमणं मुक्त जूगु खँ नं स्वास्थ्य मन्त्रालयं धाःगु दु । आः तक कोरोनां मुक्त जूपिनिगु ल्याः ६ लाख ७० हजार ६९० थ्यंगु दु ।

उकथं हे नेपाःन्यंकं कोरोना संक्रमणया कारणं सीपिनिगु ल्याः ९६६१ म्ह थ्यंगु दु ।

सम्बन्धित बुखँ

LEAVE YOUR COMMENTS