हलिं नेवाः गुथिया झिंनिक्वःगु दँमुँज्या

सक्व-  हलिं नेवाः गुथिया झिंनिक्वःगु अधिवेशन वंगु शनिवाः तःजिक जुल । गुथिया नायः जुजुमान श्रेष्ठया सभापतित्वय् जूगु ज्याझ्वलय् मूपाहांकथं झायादीम्ह शंखरापुर नगरपालिकाया प्रमुख सुवर्ण श्रेष्ठं अधिवेशनया उलेज्या यानादीगु खः ।

सक्व नगरपालिकाया हे व्यवस्थापनय् जूगु अधिवेशनय् जनकवि दुर्गालाल श्रेष्ठं विशेष पाहांकथं झायादीगु खः । ज्याझ्वलय् मूपाहां नगरप्रमुख श्रेष्ठं सक्व देय् स्थापना जूगु ३३२१ दँ क्यंगु लसताय् सकल सक्वमि नापं नेवाः समुदाययात भिंतुना बियादीगु खः ।
वय्कलं गुथिया झिंनिक्वःगु अधिवेशनया झ्वलय् सक्वया पायः जात्रा, बमनू जात्रा, वज्रयोगिनीनापं आपालं सांस्कृतिक ब्वज्या व व्यापार मेला नं संचालन जूगु धासें लसता प्वंकादिल ।

अधिवेशनय् नगर उपप्रमुख शुक्रलक्ष्मी श्रेष्ठ, विशेष पाहां जनकवि दुर्गालाल श्रेष्ठ, सक्वया संस्कृतिविद् प्रकाशमान सक्व, एमालेया प्रतिनिधि बुद्धभक्त चित्रकार, नेपाली कांग्रेसया प्रतिनिधि राजभाई मानन्धर लगायतं नुगःखँ प्वंकादीगु खः ।

अधिवेशनं गुथिया न्हूगु ज्यासना पुचःया नं घोषणा याःगु खः । न्हूगु ज्यासना पुचःया ल्ययेगु व छ्याञ्जे व दांभरिंया प्रतिवेदन न्ह्यब्वयेगु व उकियात पारित यायेगु ज्या धाःसा लछि न्ह्यः हे जूगु खः ।

अधिवेशनय् गुथिया थीथी जिल्ला कचाया आपालं प्रतिनिधिया सहभागिता दुगु खःसा ज्याझ्वःया उलेज्या न्ह्यः सांस्कृतिक जुलुसं नगर परिक्रमा नं याःगु खः। दकलय् लिपा सांस्कृतिक ज्याझ्वः नं न्ह्यब्वःगु खः ।

सम्बन्धित बुखँ

LEAVE YOUR COMMENTS