बाजुराया अस्पतालय् सीम्ह मचायात कोरोना जूगु पुष्टि

येँ – बाजुरा जिल्ला अस्पतालया आइसोलेसनय् आइतवाः सीम्ह मचायात कोरोनाया संक्रमण जूगु पुष्टि जूगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटा आइसोलेसनय् सीम्ह २दँया मचायात कोरोनाया संक्रमण जूगु पुष्टि यानादिल ।

च्यान्हु न्ह्यः भारतं लिहांवया स्थानीय बूढीगंगा नगरपालिका-१या धुरालसैन माध्यमिक विद्यालयया क्वारेन्टाइनय् च्वनाच्वंगु इलय् मचा बिरामी जूगु खः । कोरोनाया आशंकाय् उम्ह मचा नापं वया मां व बायात जेठ १५ गते अस्पताल भर्ना याःगु खः । लिपा कोरोना संक्रमणया परीक्षण याःगु इलय् मचा नापं मांयात नं संक्रमण खनेदुगु खः । मचाया बाया रिपोर्ट धाःसा नेगेटिभ वःगु दु । मांयात उगु हे अस्पतालया आइसोलेसनय् तयातःगु दु ।

थ्व नापं नेपालय् कोरोनाया संक्रमणया कारणं सीपिं ८म्ह थ्यंगु दु ।