सामाजिक संजाल संचालनय् कडाइ

सरकारं नेपालय् सामाजिक संजाल संचालनय् कडा याइगु जूगु दु । संचार व सूचना प्रविधि मन्त्रालयं तयार यानाः संघीय संसदय् दर्ता याकूगु ‘सूचना प्रविधिया सम्बन्धय् व्यवस्था यायेत दयेकूगु विधेयक’य् सामआजिक संजाल नियमनय् कडा यायेगु व्यवस्था यानातःगु दु ।

सामाजिक संजाल संचालन यायेत इच्छुक मनुखं थ्व ऐन सम्बन्धी विभागय् दर्ता यायेमाःगु व थ्व ऐन लागू जुइ न्ह्यः संचालनय् दुगु सामाजिक संजाल क्वःछिनातःगु ईया दुने विभागय् दर्ता यायेमाःगु व नेपालय् दर्ता मजूम्ह मनुखं संचालन याःगु सामाजिक संजाल प्रयोगय् सरकारं रोक लगे याये फइगु विधेयकय् न्ह्यथनातःगु दु ।

मन्त्रालयं नेपाःया संविधानया धारा २८ य् व्यवस्था यानातःगु गोपनीयताया हकयात विद्युतीय माध्यमय् तकं सुनिश्चित यायेत व धारा ४४ बमोजिम उपभोक्ता हकयात सूचना प्रविधिइ आधारित सेवा व व्यापारय् तकं सुनिश्चित यायेगु सम्बन्धय् आवश्यक कानूनी व्यवस्था यायेमाःगु व सूचना प्रविधिया विकास, प्रवद्र्धन व नियमन यायेत विद्युतीय माध्यमपाखें अभिलेख तयेगु व्यवस्था यायेमाःगु न्ह्यथनातःगु दु ।

विद्युतीय ल्हाःचिं (हस्ताक्षर)या मान्यता, विश्वसनीयता नियमित यायेत, विद्युतीय माध्यमपाखें सार्वजनिक सेवा प्रवाह यायेत संघीय संरचनाकथं न्हय्गुलिं प्रदेशय् सूचना प्रविधि अदालत नापं सूचना प्रविधि केन्द्र स्थापना यायेगुलिसें साइबर सुरक्षाया समुचित विकास यानाः साइबर अपराधयात नियन्त्रण यायेत सामाजिक संजालया प्रयोगयात व्यवस्थित व मर्यादित दयेकेत उगु मस्यौदा हयागु न्ह्यथंगु दु ।

उगु विधेयकय् सामाजिक संजालय् लाक्वपाक्व च्वइपिंत १५ गू लाख तक जरिवाना व न्यादँ तकया जेल सजाय जुइगु प्रस्ताव यानातःगु दु । सूचना प्रविधिया सम्बन्धय् व्यवस्था यायेत दयेकूगु विधेयकय् सामाजिक संजालय् सुयातं हायेकेगु, झंगः लहायेग, क्वह्यंकेगु, हतोत्साहित यायेगु, ख्यायेगु, घृणा वा द्वेष ब्वलंकेगु व सुचं प्राप्त याइम्हेसित भ्रमय् लाके मजिउगु व्यवस्था तयातःगु दु ।

सामाजिक संजाल (फेसबुक, ट्विटर, इन्स्टाग्राम, भाइबर आदि) लय् विक्री वितरण यायेत रोक लगेयानातःगु सामग्रीया विज्ञापन, प्रकाशन, प्रशारण यायेत तकं विधेयकय् रोक लगे यानातःगु दु । अथे हे देय्या सार्वभौमिकता, भौगोलिक अखण्डता, राष्ट्रिय सुरक्षा, राष्ट्रिय एकता, संघीय इकाइ दथुया सम्बन्धय् लिच्वः लाकेगु, जातीय, धार्मिक, साम्प्रदायिक व मेगु गुगुं नं आधारय् घृणा ब्वलनीगु खँ नं सामाजिक संजालय् याये मदइगु व्यवस्था यानातःगु दु ।

जातीय भेदभाव वा छुवाछुत जुइगु, शान्ति सुरक्षा भंग जुइगु खँ सामाजिक संजालय् तयेधुंकल कि १५ गू लाख जरिवाना व न्यादँइा निंतिं जेल सजाय वा निगुलिं जुइगु व्यवस्था क्वःछिनातःगु दु । थ्व बाहेकं विना तथ्य वा आधारय् सुयागुं चरित्र हत्या यायेगु उद्देश्यं गाली बेइज्जती यात धाःसां नं थ्व हे कानूनकथं कारवाही यायेगु प्रस्ताव सरकारं न्ह्यःने हःगु दु ।

विधेयकय् सूचना विभागय् दर्ता जूगु सामाजिक संजाल जक नेपालय् संचालन याये दइगु प्रावधान तयातःगु दु । ‘नेपालय् दर्ता मजूम्ह मनुखं संचालन याःगु सामाजिक संजालया प्रयोगय् सरकारं रोक लगे याये फइ’, विधेयकया दफा ९१ य् धयातःगु दु । अथे हे सामाजिक संजालय् लाक्वपाक्व च्वयेगु व च्वकेगु ज्याय् ग्वाहालि याइम्हेसित नं सजायया व्यवस्था विधेयकं याःगु दु ।

विधेयकय् कसुर यायेत ग्वाहालि याइम्ह वा गुगुं कारणं मतियार जुयाः ज्या याइम्ह व्यक्तियात नं मुख्य कसुरदार सरह हे सजाय जुइगु व्यवस्था याःगु दु । कसुर ठहर जुइगु छुं नं कथंया हानी नोक्सानी, हैरानी वा क्षति जूगु खत धाःसा अज्याःगु हानी नोक्सानी, हैरानी वा क्षतिया क्षतिपूर्ति सम्बन्धित कसुरदारपाखें बीकेगु विधेयकं व्यवस्था याःगु दु ।

नेपालय् दर्ता मजूम्ह मनुखं संचालन याःगु सामाजिक संजालया प्रयोगय् सरकारं रोकतकं लगे याये फइगु जूगु दु । मन्त्रालयं धाःसा सामाजिक संजालया नियमन यायेगु मखसे उकिया मार्फत जुइगु उच्छुंखल गतिविधि पनेत जक स्वयागु खः धाःगु दु । थ्व हे झ्वलय् नेपाल पत्रकार महासंघं सामाजिक संजालयात कडाइ यायेगु ज्या अभिव्यक्ति स्वतन्त्रता खतराय् लाये फइगु धासें चिउताः प्वंकूगु दु ।

महासंघया उपाध्यक्ष विपुल पोखरेलं आलोचना न्यनोगु संस्कृति बन्द यायेत स्वःगु द्वपं बियादिल । थज्याःगु ज्यां समाजय् भय सिर्जना जुइगु वय्कःया तर्क दु । अथे हे अधिवक्ता अस्मिता पोखरेलं गोपनीयताया अधिकारयात कार्यान्वयन यायेत न्हापां गोपनीयतासम्बन्धी विधेयक वयेधुंकूगु अवस्थाय् हाकनं व हे सम्बन्धी प्रावधान थुगु कानूनय् समावेश जुइगु धइगु गम्भिर विषय जूगु धयादिल ।

कानून मस्यौदाकर्ता पुलांगु कानून मस्वसे निगू वा व स्वयां अप्वः ऐनय् छगू हे कथंया कानूनी प्रावधान तयेगु उपयुक्त मजुइगु वय्कःया धापू दु ।

सम्बन्धित बुखँ

LEAVE YOUR COMMENTS