माधवनारायणया देगः दनेत क्षमा पुजा
येँ – सक्वय् माधवनारायणया देगः दनेत क्षमा पुजा याःगु दु । सक्वय् माघ लछियंकं न्ह्याइगु श्रीस्वस्थानी व्रतया इलय् मेला जुइगु व व्रत च्वनीगु नादी खुसिइ माधवनारायणया देगः दनेत्यंगु खः ।
माधवनारायणया व्रत जुइगु नादी खुसि लिक्कं जगटीइ दयेकेत्यंगु देगःया निंतिं उगु क्षमा पुजा याःगु खः । सक्वया राजपुरोहित सुदन राजोपाध्याय मूल पुरोहित जुयाः याःगु क्षमा पुजाय् सक्व नगरपालिकाया प्रमुख सुवर्ण श्रेष्ठ, वडाअध्यक्ष विष्णुप्रसाद श्रेष्ठ, राधाकृष्ण श्रेष्ठ, श्री माधवनारायण स्वस्थानी व्रत तथा शालिनदी सुधार समितिंया अध्यक्ष मिजेन्द्रकाजी श्रेष्ठलगायतया उपस्थिति दुगु खः ।
उगु देगः स्वंगू करोड न्यय्गू लख लागतय् दयेकेत्यंगु खःसा देगःया डिजाइन आर्किटेक्ट इन्जिनियर अनिल श्रेष्ठं यानादीगु खः । देगः दनेत सक्व नगरपालिका वडा नं. ६या वडाअध्यक्ष राधाकृष्ण श्रेष्ठं २,११,१११÷– तका दां नगरप्रमुख श्रेष्ठयात लःल्हाानादीगु खःसा उगु ध्यबा नगरप्रमुख श्रेष्ठं समितिया नायः श्रेष्ठयात लःल्हानादीगु खः ।
देगः निर्माणया ज्या याकनं न्ह्याकाः वइगु दँया दुने क्वचायेकेगु लक्ष्य तयातःगु दु ।
LEAVE YOUR COMMENTS