आः छु जुइ जसपा एकताया भविष्य ?

येँ – प्रधान मन्त्री शेरबहादुर देउवायात जसपाया महन्थ ठाकुर पक्षं समर्थन यायेधुंकाः आः जसपाया भविष्य छु जुइ धइगु चर्चा पिदंगु दु । जसपा दुने महन्थ ठाकुर पुचः व उपेन्द्र यादव पुचःया दथुइ देउवा व केपी ओली मध्ये सुयात समर्थन यायेगु धइगु खँय् कचवं जुयाः अन्ततः विभाजया अवस्था पिहां वःगु खः । आः वयाः निगुलिं पुचलं देउवायात हे समर्थन याःगुलिं आः थ्व पार्टी हाकनं एकीकृत जुइगु सम्भावना दु लाकि मदु धइगु न्ह्यसः पिहां वःगु खः । जसपा संघीय परिषदया अध्यक्ष डा.बाबुराम भट्टराईया स्वकीय सचिव रोशन पोखरेलं धाःसा तत्काल निगू पुचः छगू जुइगु सम्भावना मदुगु खँ धयादीगु दु ।

ठाकुर पक्षं थःगु गल्ती स्वीकार मयायेकं आः एकता जुइगु सम्भावन मदुगु खँ वय्कलं धयादिल । ‘नेपालभाषा टाइम्स’ लिसे खँ ल्हासें पोखरेलं धयादिल, ‘निर्वाचन आयोगय् बुझे यानातःगु फर्जी भ्वं लित कयाः गल्ती जुल धकाः वःसा पार्टीं सोचे याये फइ जुइ ।’

उकथं हे ठाकुर पक्षं धाःसा जसपा आः तक विभाजन मजूनिगु जुयाः नापं न्ह्याः वनेगु धइगु बारे सहलह जुयाच्वंगु खँ धाःगु दु । कानुनी रुपं पार्टी विभाजन मजूगुलिं अझं नापं वनेगु लँपु दुगु खँ कार्यकारिणी समितिया दुजः शरतसिंह भण्डारीं धयादीगु दु । भण्डारीं ‘नेपालभाषा टाइम्स’ लिसे खँ ल्हासें धयादिल, ‘गज्याः गज्याःगु पार्टी तज्यानाः आः हाकनं छप्पँ जूगु दु, जसपा कानुनी रुपं विभाजन जूगु मदुनि, अथे जुयाः आः हाकनं सहलह ब्याकाः पार्टीयात छप्पँ यायेगु सम्भावना यक्व दु ।’

यादव पक्षं धाःसां देउवायात भोट बी न्ह्यः संसदय् ठाकुरं न्ववाःगु खँ न्यनेबलय् अझ नं पार्टी छप्पँ यायेत समस्या जुइफइगु खँ धाःगु दु । ठाकुरं संसदय् न्ववायेगु झ्वलय् देउवा सरकार जनादेशं वःगु मखु परमादेशं वःगु धकाः न्ववानादीगु खः उकियात कयाः यादव पक्षं असन्तुष्टि प्वंकाच्वंगु दु ।

सम्बन्धित बुखँ

LEAVE YOUR COMMENTS