नेपालभाषां ब्वंकीपिं प्रशिक्षण सहायकया लिच्वः पिदन

येँ – येँ महानगरपालिकां स्थानीय पाठ्यक्रम ब्वंकेगु निंतिं प्रशिक्षण सहायक पदय् नियुक्तीया निंतिं काःगु प्रयोगात्मक परीक्षाया लिच्वः पिथँगु दु । सोमवाः बहनी येँ महानगरपालिकाया शिक्षा विभागं थ्व लिच्वः पिथंगु खः । प्रयोगात्मक परीक्षाय् ४०४ म्ह उत्तीर्ण जूगु दु ।

येँ महानगरपालिकां वंगु फागुन २२ गते निसें २९ गते तक प्रयोगात्मक परीक्षा काःगु खः । आः उत्तीर्ण जूपिनि अन्तर्वार्ता चैत १२ गते निसें १८ गते तक न्हिं ५०–५० म्ह यानाः काइगु जूगु दु ।

थ्व पदया निंतिं ५१६ म्हेसिनं आवेदन बिउगु खः । आः प्रयोगात्मक परीक्षाय् उत्तीर्ण जूपिंत अन्तर्वार्ता कयाः १७२ म्ह प्रशिक्षण सहायक ल्यइगु जुइ । थुपिं प्रशिक्षण सहायकपिंसं येँ महानगरपालिका दुने लाःगु सरकारी स्कुलय् येँ महानगरपालिकां तयार याःगु पाठ्यक्रम कथं कक्षा १ निसें कक्षा ८ तक स्थानीय भाषा नेवाः भासं आखः ब्वंकीगु जुइ ।

येँ महानगरपालिकां स्थानीय भासं आखः ब्वंकेगु निंतिं तयार याःगु पाठ्यक्रम कथं येँ देय् म्हसीका नामं पाठ्यसफू नं पिकायेधुंकूगु दु । थ्व सफू कक्षा १ निसें कक्षा ८ तक येँ महानगरपालिका दुने लाःगु सामुदायिक व निजी स्कुलय् अनिवार्य कथं ब्वंकीगु जुइ ।