निगू नगरपालिका स्वाइगु ताँया उलेज्या

किपू – येँया दक्षिण पश्चिम लागापाखे लाःगु निगू नगरपालिका स्वाइगु ताँया उलेज्या जूगु दु । किपू नगरपालिका व चन्द्रागिरि नगरपालिका निगू नगरपालिका स्वाइगु ताँया उलेज्या याःगु खः ।

शिक्षा, विज्ञान तथा प्रविधिमन्त्री कृष्णगोपाल श्रेष्ठं किपू व चन्द्रागिरि नगरपालिका स्वाइगु दीखु ताँया उलेज्या यानादीगु खः । उलेज्या लिपा ताँया महत्वया बारे खँ कनादिसें मन्त्री श्रेष्ठं भूमिगतकालय् थः पार्टीया ज्याय् लगे जुयाच्वनागु इलय् दक्षिण–पश्चिम स्वाइगु थुगु ताँया थम्हं आपालं छ्यलागु लुमन्ति कनादीगु खः । मदुम्ह जननेता मदन भण्डारीयात थक्वातं किपुलिइ जुइगु ज्याझ्वलय् ब्वति कायेकेत हयागु इलय् दीखु ताँय् हे च्वनाः बल्खुया यइपुसे च्वंगु लु स्वयागु नापनापं पार्टीया भावी योजना नं दयेकागु वय्कलं लुंमकादिल ।

२०७६ साल पुस १२ गते मन्त्री श्रेष्ठया हे उपस्थितिइ तत्कालीन भौतिक पूर्वाधार तथा यातायात मन्त्री वसन्त नेम्वाङं उगु ताँया शिलान्यास यानादीगु खः । ताँ पुनःनिर्माणया निंतिं शिलान्यास जूगु छुं ई लिपा हे कोरोना महामारी न्यना वनेवं निर्माणया ज्या छुं भचा लिज्याः वंगु खःसां क्वःछिनातःगु इलय् हे निर्माण सम्पन्न यायेत ताःलाःगुलिसें निर्माण कम्पनीयात सु्भाय् बियादिसें मन्त्री श्रेष्ठं ताँ दयेकेगु भाला जक निर्माण कम्पनीं काःगु व ताँया फिनिसिङ यायेगु ज्या अझं ल्यं दनिगुलिं उकिया निंतिं नेपाल सरकारं बजेट विनियोजन याःगु जानकारी नं वय्कलं बियादिल ।

स्वास्थ्य मन्त्रालयया जिम्मेवारीतकं कःघाना वयाच्वनादीम्ह मन्त्री श्रेष्ठं नेपाल सरकारया न्हापांगु प्राथमिकता जनताया जीवन रक्षा व इमिगु स्वास्थ्य खः धासें शुक्रवाः सुथय् च्यागू लख चिनिया खोप नेपाः थ्यंकः वःगु व छवाःया दुने मेगु झिंनिगू लख खोप वयेत्यंगु नं जानकारी बियादिल ।

ज्याझ्वःया सभापतिलिसें किपू नगरपालिकाया प्रमुख रमेश महर्जनं दीखु ताँ छपु ताँया रुपय् जक सीमित मजू धासें थ्व ताँ ऐतिहासिक व भावनालिसे नं स्वानाच्वंगु खँ न्ह्यथनादिल । किपू व चन्द्रागिरिया तीनथानाया ऐतिहासिक सम्बन्ध दुगु कुलादिसें वय्कलं ताँ स्यंगुलिं हे भावनात्मक सम्बन्ध नं तापाना वंगु खः धयादिल । ताँ दयेकेत तःक्वःमछि कुतः यानागु खःसां सफल जुइमफया च्वंगु, थःपिं नगरपालिकाय् जनप्रतिनिधि जुयाः वयेधुंकाः टेण्डर आह्वान यानाः नं आन्तरिक कारणं निर्माण जुइ मफुगु ताँ अन्ततः मन्त्री श्रेष्ठ व तात्कालीन मन्त्री नेम्वाङया पहलय् निर्माण यायेत ताःलाःगुलिं वय्कलं लसता नं प्वंकादिल ।

किपू नगरपालिकाया उपप्रमुख सरस्वति खड्कां लसकुस यानादीगु ज्याझ्वलय् पुल महाशाखाया डि.जि सडक विभागया महानिर्देशक ईं अर्जुनजंग थापा, किपू नगरपालिका वडा नं. २ या वडाअध्यक्ष रमेशमान डंगोल, ३ वडाअध्यक्ष राजेन्द्र महर्जनं नं नुगःखँ तयादीगु ख ।

नेपालभाषा टाइम्स

च्वमिया मेमेगु

• जुगि जातया आवासया समस्या
• मेलम्चीया लः वइगु अझं अनिश्चित
• बँ पसः तयेके हे मबीगु बालेनया अडान
• फणीन्द्रयात सिद्धिदास सिरपाः
• इहिपा ज्याझ्वलय् मिं नयाः सछिम्ह मल्याकं सित