नेवाः ज्ञानकोश दयेकेत एकेदेमिं ज्या न्ह्याकल

येँ – नेवाः जातिलिसे स्वानाच्वंगु सम्पूर्ण विषयया दँ दुथ्याकाः ‘नेवाः सांस्कृतिक ज्ञानकोश’ दयेकेगु लागिं नेपालभाषा एकेदमिं पहल न्ह्याकूगु दु । उकिया लागिं थीथी ख्यःयापिं नेवाः विद्वान व विज्ञपिनि वृहत् भेला यासें नेवाः ज्ञानकोश गज्याःगु जुइमाः व थ्व ग्रन्थ गय् यानाः दयेका वने धइगु बारे सहलह ब्याकेगु ज्या याःगु दु ।

बुधवाः याःगु उगु भेलाय् सहभागी नेवाः विद्वानतय्सं थीथी न्हय्गू पुचः दयेकाः नेवाः ज्ञानकोशय् दुथ्याकेमाःगु विषय, थ्वलिसे सम्बन्धित जानकारी व उकियात प्रस्तुत यायेगु शैलीया बारे सहलह याःगु खः । वाङ्मय शताब्दीपुरुष सत्यमोहन जोशी मूपाहां कथं झाःगु उगु ज्याझ्वः नेपालभाषा एकदेमिया चान्सलर चित्तरञ्जन नेपालीया सभापतित्वय् जूगु खः ।

उकी ज्ञानकोशया अवधारणा बारे ज्ञानकोश परियोजनाया संयोजक वरिष्ठ संस्कृतिविद् यज्ञमानपति वज्राचार्य व एकेदेमिया सदस्य सचिव मल्ल के. सुन्दरं ज्यापौ न्ह्यब्वयादीगु खः । वय्कःपिंसं थ्व ज्ञानकोशय् नेवाः जातिलिसे स्वानाच्वंगु कला, संस्कृति, साहित्य,
रहनसहन, सामाजिक संरचना, नसात्वँसा आदि विषयया खँ दुथ्याकेगु खँ प्रस्ताव यानातःगु दु ।

मुँज्यापाखें पिहां वःगु लिच्वःया लिधंसाय् छगू आधारपत्र दयेकाः येँ महानगरपालिकाय् न्ह्यब्वयेगु खँ धाःगु दु । स्वदँया दुने निर्माण यायेगु धकाः ताः तयातःगु थ्व कोश दयेकेया लागिं माःगु आर्थिक ग्वाहालिया लागिं येँ मनपालिसे खँल्हाबल्हा जुयाच्वंगु दु ।

सम्बन्धित बुखँ

LEAVE YOUR COMMENTS