राष्ट्रपतिया तं अझं क्वमलाःनि

येँ- न्हू नियुक्त जुयादीम्ह महान्यायाधिवक्ता खम्मबहादुर खातीया शपथ ग्रहण म्हिगः सर्वोच्च अदालत दुने हे जुल । राष्ट्रपति कार्यालयं वय्कःयात राष्ट्रपति भवनय् शपथ ग्रहण याकेत अस्वीकार यायेवं सर्वोच्च अदालतय् हे शपथ ग्रहण जूगु खः। थ्व स्वयां न्ह्यः फुक्कं धइथें महान्यायाधिवक्तातय् शपथ ग्रहण राष्ट्रपति भवनय् राष्ट्रपतिया उपस्थितिइ प्रधानन्यायाधीशपाखें याकीगु खः । थुगुसी राष्ट्रपति विद्यादेवी भण्डारीं हे शपथ ग्रहण मयाकेगु खँ धाःगु सीदुगु दु ।

संविधानया धारा १५७ स प्रधानमन्त्रीया सिफारिसय् राष्ट्रपतिं महान्यायाधिवक्ता नियुक्त यायेगु व्यवस्था दु । नापं शपथ धाःसा राष्ट्रपतिया उपस्थितिइ प्रधानन्यायाधीशं याकेगु चलन दु । तर खातीया शपथ ग्रहणय् राष्ट्रपति उपस्थित मजुइवं थीथी कथंया न्ह्यसः ब्वलनेगु शुरु जूगु दु ।

प्रधानमन्त्री शेरबहादुर देउवाया शपथ ग्रहण जूबलय् राष्ट्रपतिं न्हू नियुक्त जूम्ह प्रधानमन्त्रीयात बधाई तकं मबिसे पिहां वनाछ्वःगु खःसा उकिं यानाः वय्कःया आलोचना जूगु खः । म्हिगः शपथ ज्याझ्वलय् नं उपस्थित मजुइवं राष्ट्रपतिया आलोचना जूगु दु ।