थ्व धापू लुमंके माली

अन्ततः प्रतिनिधि सभाया निर्वाचनया मिति पिहां वल । पिहां ला वल । तर छम्ह राजनीतिक विश्लेषकं धाइ । देशय् थौं न्ह्यागु इलय् नं न्ह्यागुं जुइफु । अनिश्चिततां ग्रस्त राजनीतिक परिस्थिति । छुं न छुं त्वह तयाः घोषित मितियात फाता पुइके फु । छु ठेगान ! छु भर ! आशंकै आशंकाया घेराय् न्ह्यानाच्वंगु थौंया अराजक राजनीतिक स्थिति छुं खँय् नं धुक्क जुइ फइगु अवस्था मदु । न्ह्यागु जूसां नं निरीह जुयाच्वनेगु । थौंया जनताया विवशता । तर मिति हे घोषणा जुइधुंकूगुलिं शंका आशंका दुने च्वनाः नं निर्वाचन जुइ, जुइमा । विश्वास काये माला बी ।

दुर्भाग्यया खँ । चुनाव हे जूसां थौं देय् जनतां छुं आशा याये फइगु अवस्था मदु । याये थाय् मदु । कारण थौं थ्व चुनाव देय्, जनताया हित, कल्याणया निंतिं जुइत्यंगु हे मखु । थुकिं जनतां छुं लाभ काये फइ धइगु मात्र दिवास्वप्न जक जुइ । गुगु पूर्ति जुइमखु । चुनावय् प्रतिस्पर्धी मू दलतय् चुनावी एजेन्डा दलतय् आपसी काटमार य् हे केन्द्रीत जुइ । वइगु चुनावं थुकथं अदृश्य रुपं राजनीतिक कोटपर्वया रुप काः वनेफु । देय्, जनताया निंतिं थ्व शुभ लक्षण मखु ।

वइगु चुनावया युद्ध मैदानय् गठबन्धन व एमाले आमने सामने दं वइ । इमि राजनीतिक अभिष्ट छगुलिं मेगुयात निषेध यायेगु, फुसा निम्तयान्न यायेगुलिइ हे केन्द्रीत जुयाच्वंगु खनेदु । थ्व हे अभिष्ट पूर्ति यायेया लागि निगलिं पक्षं देय् दुने, पिनें थःथः पक्षय् शक्ति संचय यायेगु खँय् तत्पर खनेदु । देय् जनताया हित, कल्याणया निंतिं आकर्षक मुद्दा न्ह्यथनाः चुनावय् जनमतया निंतिं प्रतिस्पर्धा यायेमाःपिं दलतसें थौं थःथःगु निकृष्ट स्वार्थया लागि चुनावयात छ्यलेत क्रियाशील खनेदु । चुनाव देश, जनताया उत्तरोत्तर विकासया लागि छगू तःधंगु राजनीतिक अवसर खः धइगु विश्वास विपरित थौं देय्या राजनीतिक अवस्थाया सन्दर्भय् चुनाव राजनीतिक भाँडभैलो, कलह, अशोभनीय कारक जुइगु यथेष्ट सम्भावना खनेदु । थज्याःगु हे सम्भावनाया त्रासं जनता थःगु राजनीतिक भविष्यप्रति झं झं निराश, चिन्तित जुया वयाच्वंगु दु ।

दुःखया खँ । देशय् अनेक ऐतिहासिक क्रान्तिकारी जनमुखी आखः ग्वलं शोभित दलत दुसां सैद्धान्तिक अडान, नीतिगत प्रष्टता इमिके खनेमदु । दलया संचालन नेतृत्वय् च्वंपिनि सनककथं जक जुयाच्वंगु खनेदइ । खः । दलयात न्ह्याकेत नेतृत्व पक्ष नं उतिकं महत्वपूर्ण जुइ । तर । नेतृत्वं दल हाँके यायेबलय् दलया सिद्धान्त, नीतिगत इमान्दारिताप्रति नं चिउताः तयेमाः । अझ देय्, जनताया हित, कल्याणयात सर्वोपरि खंकेमाः ।

तर थौं प्रत्येक दल नेतामुखी जुयाः नेतातय् अहम्, स्वार्थ, महत्वकांक्षाया निंतिं समर्पित जुयाच्वंगु दु । दलया कार्यकर्तातय्त नेतृत्वं अन्धभक्तकथं ब्वलंकाच्वंगु दु । हरेक दलय् फरक मत, पृथक आवाजया कदर मदु । नेतृत्व पंक्तिया बर्चस्वं हे राज यानाच्वंगु खनेदु । थ्व हे कारणं देशय् अनेक नांजाःगु दलत दुसां धाक धक्कु फुक्क इमि आत्मकेन्द्रीत, शक्ति पिपासु नेतातय् खल्तीइ लाइ । नेपाःया थौंया राजनीतिक रंगमञ्चय् हालीमुहाली यानाच्वंपिं एकुमष्ट दलया नेतातय् सर्वसत्तावादी भूमिकां थ्व खँ छर्ल· जुइ ।

देशय् जुइत्यंगु प्रतिनिधि सभाया चुनाव थौं देय्, जनताया निंतिं गम्भिर विषय खः । देय् व जनताया भाग्य निमांणय् जरुर थ्वया प्रभाव लाइ । तर थज्याःगु महत्वपूर्ण अवसरयात देय्, जनताया निंतिं मछ्यसे एकमुष्ट कथित नेतातय्सं थःथःगु स्वार्थ, शक्तिया निंतिं उपयोग यायेत भरमग्दुर कुतः यानाच्वंगु दु । थुमिसं थःगु स्वार्थ सिद्ध यायेत न्ह्यागुं आपराधिक ज्या नं यायेफु । ध्यबा ह्वलेफु । जनतायात दिग्भ्रमित यायेफु । क्वपुलांपिं नेतातय्त थ्व चुनावय् निषेध याये मफुसा देय् जनता, सम्बन्धित दलतय्सं नं दुःख सी ।

अन्ततः देय् दुने पिनेया शक्तितय् प्रभावय् लाइ । अस्थिर कलहभूमि जुइ । छम्ह ग्रामिणजनं टि.भीइ नवागु न्यने । म्येय् नं दुरु मबिल कि म्येय्यात मियाछ्वइ । मेम्ह न्याना हइ । अथे हे ज्याख्यलय् मदुपिं नेतातय् नं चिइकेमाः । न्हूपिं नेतात हयेमाः । थौंया चुनावय् मतदातां थ्व धापू लुमंकेमाली ।