सार्वजनिक यातायातया थकाःगु भाः क्वकायेत माग
येँ – सार्वजनिक सवारी साधनय् २८ प्रतिशत भाडा थकाःगु विरोधय् न्यागू विद्यार्थी संगठनं आन्दोलनया घोषणा याःगु दु । विद्यार्थी संगठनतय् दथुइ म्हिगः जूगु बैठक लिपा जारी याःगु प्रेस विज्ञप्तिइ भाः क्वमकाल धाःसा तच्वःगु आन्दोलन यायेत विद्यार्थी बाध्य जुइ धासें अज्याःगु आन्दोलनया जिम्मेवारी सरकारं काये मालीगु ख्याच्वः नं बियातःगु दु ।
म्हिगः जारी याःगु प्रेस विज्ञप्तिइ धयातःगु दु, ‘भाडा वृद्धिया निर्णय तत्काल खारेज मयात धाःसा कडा संघर्षय् कुहां वयेगु जुइ व उकिया फुक्कं जिम्मेवार सरकार जुइगु ख्याच्वः बियाच्वना, कोरोनाया कारण समस्याय् लानाच्वंपिं लाखौंया रोजगारी तंकाः च्वनेमाःगु, जनता आर्थिक रुपय् जर्जर जुयाः छछाः जा नयेत तकं थाकुयाच्वंगु इलय् तच्वयेक मात्राय् भाडा वृद्धि यायेगु निर्णय गरिबमारा खः ।’
आन्दोलनया ज्याझ्वः कथं कन्हय् १ गते यातायात व्यवस्था विभागय् ज्ञापन पौ लःल्हायेधुंकाः आन्दोलनया थप ज्याझ्वः घोषणा यायेगु खँ विद्यार्थी नेतातय्सं धाःगु दु ।
उकथं हे आयल निगमं पेट्रोलियम पदार्थया भाः छतकाः जक क्वकाःगुलिं नं विद्यार्थी संगठनतय्सं असन्तुष्टि प्वंकूगु दु । विद्यार्थी संगठनतसं निगमं २०७१ लिपा विद्यार्थीया आन्दोलनया मागयात आंशिक रुपं सम्वोधन यायेगु कुतः याःसां नं पर्याप्त मजू धासें विज्ञप्तिइ धयातःगु दु, ‘निगमं छखे स्वचालित मूल्य प्रणालीयात इमानदारीपूर्वक कार्यान्वयन यानाच्वंगु मदुसा मेखे विद्यार्थी सहुलियतयात लागू यानाच्वंगु मदु, अथ ेजुयाः पेट्रोलियम पदार्थय् कयातःगु कर व अन्य गुलिखे असान्दर्भिक शीर्षकय् म्हयेगु यानाच्वंगु ध्यबा क्वपालाः थप भाः क्वकायेत व एलपी ग्यासय् निगू रंगया सिलिन्डर दयेकाः विद्यार्थीयात परिचयपत्रया आधारय् तत्काल सहुलियत भावं उपलब्ध याकेत नं माग यानाच्वना ।’
उकथं हे विद्यार्थी संगठनं निवर्तमान शिक्षामन्त्री कृष्णगोपाल श्रेष्ठं पद त्वःतेगु झ्वलय् विदेशी विश्वविद्यालयया सम्बन्धनय् चाःगु कलेजया नां, थाय् व विश्वविद्यालय् हिलेगु नामय् तःधंगु आर्थिक चलखेल याःगु द्वपं बिसें उकियात छानबिन यायेत नं माग याःगु दु ।
LEAVE YOUR COMMENTS