राजपाया संविधान संशोधन विधेयक दर्ता जुइमफुत

येँ – राष्ट्रिय जनता पार्टीं दर्ता यायेत्यंगु संविधान संशोधनया विधेयकया प्रस्ताव दर्ता यायेत संसद सचिवालयं अस्वीकार याःगु दु ।

राजपाया संसदीय दलया नेता महन्थ ठाकुर सहितया नेतात संशोधन विधयेक दर्ता यायेत शुक्रवाः संघीय संसद सचिवालय थ्यंगु दु । तर सचिवालयया महासचिव भरतराज गौतमं थुकीया बारे सभामुखनाप परामर्श यायेमाःगु धासें प्रस्ताव दर्ता यायेत अस्वीकार यानादीगु खः । राजपाया संशोधन प्रस्ताव बारे आइतवाः लिसः बीगु खँ सचिवालं धाःगु दु ।

राजपां भाषा, अंगीकृत नागरिकता, समानुपातिक प्रतिनिधित्व, प्रदेशया सिमांकन लगायतया बारे संशोधन प्रस्ताव दर्ता यायेत्यंगु खः । प्रस्ताव दर्ता यायेगु झ्वलय् राजपा नेता ठाकुरं न्हापा नेपाली कांग्रेस व माओवादीं हःगु प्रस्ताव हे थःपिंसं दर्ता यायेत स्वयागु प्रतिकृया बियादिल ।

सरकारं सार्वजनिक याःगु नेपाःया न्हूगु नक्सा कथं संविधानया अनूसुची–३य् निशान छाप हिलेगु निंतिं संविधान संशोधन प्रस्ताव दर्ता यायेधुंकूगु दु । सरकारया वहे प्रस्ताव नापं थःपिनिगु मुद्दा नं छक्वलं संशोधन यायेमाःगु धासें राजपां गैर सरकारी प्रस्ताव दर्ता यायेगु संसद सचिवालय थ्यंगु खः ।