न्हय्गू बौद्धस्थल दुथ्याकाः गुरुयोजना दयेकीगु

कपिलवस्तु (रासस) – कपिलवस्तुय् लाःगु भगवान गौतम बुद्धलिसे सम्बन्धित पुरातात्विक स्थलतय्त स्वानाः गुरुयोजना दयेकीगु जूगु दु । प्रदेश नं. ५ या महत्वपूर्ण पर्यटकीय सम्पदा कथं कयावयाच्वंगु जुजु शुद्धोदनया दरवार तिलौराकोट, हजारौं शाक्यतय् बधस्थल सगरहवा, बुद्धं न्हापांखुसी भिक्षुतय्त सम्बोधन याःगु थाय् कुदान, कनकमुनि बुद्धया जन्मभूमि निग्लिहवा, क्रकुच्छन्द बुद्धया जन्मभूमि गोटिहवा व बौद्धकालिन स्तूप लूगु थाय् अरौराकोटयात दुथ्याकाःगु दीर्घकालिन गुरुयोजना दयेकेत्यंगु खः ।

लुम्बिनी विकास कोषया उपाध्यक्ष भिक्षु मैत्तेय (अवधेशकुमार त्रिपाठी) या कथं वृहत्तर लुम्बिनी क्षेत्र बौद्ध परिपथया योजना व लुम्बिनी, कपिलवस्तु व रामग्राम दुनेया फुक्कं बौद्ध सम्पदायात छगू हे खाकाय् तयेगु योजना दुगु खँ कनादिल । ‘तिलौराकोटयात केन्द्रय् तयाः गुरुयोजना दयेकेगु ज्या जुइ’ वय्कलं धयादीगु दु, ‘न्हूगु अध्ययन कथं तिलौराकोट क्षेत्रय् नेपाःया दलकय् पुलांगु सभ्यता लूगु दु ।’ विज्ञतय् कथं बुद्ध स्वयां १६ स दँ न्ह्यःया सभ्यता खनेदुगु खः । ‘गुगु एशियाय् तक्षशिला व गान्धार क्षेत्रलिसे तुलना यायेफइ’ वय्कलं धयादीगु दु, ‘संरचनायात दीर्घकालिन संरक्षणया प्राथमिकता बीगु कथं योजना दयेकेगु जुइ, वइगु खुलाया दुने गुरुयोजनाया खाका दयेकेगु जुइ ।’

वय्कःया कथं लुम्बिनी वइपिं पर्यटकतय्त तिलौराकोट तक थ्यंकेगु लक्ष्य दु। पर्यटक चाःहिलेगु निंतिं लँ, बसपार्क, आराम यायेगु थाय्, स्थानीय सामग्री मीगु थाय् नं दयेकीगु योजना दु। कपिलवस्तु व बौद्धकालिन इतिहास सयेकेगु थाय्या कथं नं थुकियात विकास याइगु जुइ । गुरुयोजनाया निंतिं विज्ञतय्सं दछि न्ह्यवनिसें ज्या यानाच्वंगु लुम्बिनी विकास कोषं धाःगु दु। जग्गा अधिग्रहण लिसे मू संरचना दयेकेत १६ अर्ब तुइगु अनुमान यानातःगु दु। गुरुयोजना दयेकेगुनिंतिं पुरातत्वविज्ञ डा. सञ्जय उप्रेतीं ज्या यानाच्वंगु दु। उप्रेतीं रामग्रामया गुरुयोजना नं दयेकूगु खः ।

कोषं तिलौराकोटया गुरुयोजना दयेकेगु निंतिं न्हापांगु चरणय् जिल्लाया प्रतिनिधित्व यानाच्वंपिं सांसद, जननिर्वाचित प्रतिनिधि, स्थानीय समाजसेवी व सरोकार पक्षलिसे सहलह ब्याकूगु दु ।