‘देवकोटा जन्म जूगु छेँ थुंगु मदु’

महाकवि लक्ष्मीप्रसाद देवकोटा जन्म जूगु मूल छेँ । थ्व छेँ थुनेत्यंगु मदु ।

येँ – खस नेपाली भाय्या महाकवि लक्ष्मीप्रसाद देवकोटाया छेँ थुना छ्वत धकाः थौंकन्हय् उगु भाय्या छपुचः साहित्यकारत अतिकं तम्वयाच्वंगु दु । देवकोटाया छेँ थुनाः अन संग्रहालय दयेकेगु धकाः नेपाल प्रज्ञा प्रतिष्ठानं योजना दयेकूगु खःसा नकतिनि प्रज्ञा प्रतिष्ठानया हे ग्वसाः कथं उगु छेँ थुनेगु ज्या जूगु खः ।

थ्व खँयात कयाः खस नेपाली भाय्या साहित्यकारतय्सं ‘देवकोटाया छेँ थुन’ धकाः विरोध याःसां प्रज्ञा प्रतिष्ठानं धाःसा आः थुनाछ्वःगु छेँ वास्तवय् देवकोटा जन्म जूगु छेँ मखु धाःगु दु । प्रज्ञा प्रतिष्ठानया सदस्य सचिव जगत प्रेक्षितं ‘नेपालभाषा टाइम्स’ यात कनादी कथं देवकोटा जन्म जूगु छेँ ला डिल्लीबजारय् दु । अंशवन्डा जूबलय् उगु छेँे देवकोटाया ककाया भागय् लाः वंगु खः । आः संग्रहालय दयेकेत्यंगु छेँ ला देवकोटां लिपा न्याना काःगु छेँ खः । थ्व छेँ नं थौंकन्हय् पाःताः जुइधुंकूगु दु । प्रतिष्ठानं थौंकन्हय् वहे पाःताः जूगु छेँया भग्नावशेष जक चीकेत्यंगु खः । उकिं देवकोटा जन्म जूगु छेँ थुन धकाः आः वयाच्वंगु खँय् सत्यता मदुगु दावी वय्कलं यानादिल ।

देवकोटा लिपा च्वं वंगु थ्व छेँ नं सरकारं देवकोटाया हे काययाके निगूत्या करोड दां पुलाः न्याना काःगु खः । देवकोटा जन्म हे जूगु छेँ थौंकन्हय् वय्कःया ककाया सन्तानया ल्हातय् दुगु जुयाः व छेँ मी ममी धाये मफु । साहित्यकारतय्सं खास खँ हे मथुइकुसे विरोध याना हयाच्वंगु खँय् नं सदस्य सचिव प्रक्षितं दुःख प्वंकादीगु दु ।

लुमंकेबहः जू, नेपालभाषाया झी कवि चित्तधर हृदयया तुंछेँस्थित छेँयात नं संग्रहालय दयेकेगु ज्या जुइधुंकूगु दु । नेपाःया सुं नं साहित्यकारया छेँयात संग्रहालय दयेकूगु थ्वहे न्हापांगु खः । तर झी कवि चित्तधरया उगु छेँ सरकारं न्याना काःगु मखु, स्वयम् चित्तधरं हे समाजया लागिं दान यानादीगु खः । अथे हे मेम्ह साहित्यकार प्रेमबहादुर कसाःजुं न्याना तःगु जग्गाय् हे थौंकन्हय् आशा सफूकुथि व च्वसापासा दनातःगु दु । २०७२ सालया तःभुखाचय् क्षति जूगु चित्तधरया छेँयात आः जगंनिसें हे थुनाः न्हूधाः यायेगु लागिं भारत सरकारं आर्थिक ग्वाहालि बिउगु दु ।

सम्बन्धित बुखँ

LEAVE YOUR COMMENTS