यल महानगरं नं ब्रुमर न्याइगु

यल – यल महानगरपालिकां नं नगर सफा यायेत ब्रुमर न्याइगु जूगु दु । थ्व हे वइगु असार तक यल महानगरं निगः ब्रुमर न्यायेत्यंगु खः । यल मनपां सतकय् च्वंगु धू सफा यायेगु निंतिं थ्व ब्रुुमर न्यायेगु प्रक्रिया न्ह्याकूगु खः ।

ब्रुमर न्यायेगु निंतिं ठेक्का सम्झौता प्रक्रिया न्ह्याकूगु खँ यल मनपां धाःगु दु । यल मनपां स्विट्जरल्यान्डय् दयेकूगु ब्रुमर न्यायेत्यंगु खँ प्रवक्ता राजु महर्जनं कनादिल ।

यल मनपां शहरी क्षेत्रय् धू सफा यायेत निगः जक ब्रुमर दुसां गाःगु खँ धाःगु दु । प्रवक्ता महर्जनं धयादी, ‘नगर दुनेया
क्षेत्रय् सफा यायेत आःयात निगः ब्रुमर पर्याप्त जुइ ।’

यल मनपां न्यायेत्यंगु ब्रुमर यँे महानगरपालिकां आः सञ्चालनय् हयाच्वंगु ब्रुमर थें आधुनिक सुविधा सहितया जुइगु खँ प्रवक्ता महर्जनं कनादीगु दु । यल मनपाय् थौंकन्हय् छगः चिग्वःगु ब्रुमर दुसां सञ्चालनय् धाःसा मवःगु खँ नं वय्कलं कनादीगु दु ।

वय्कःया कथं आः दुगु ब्रुमरं यक्व कुँ वांछ्वःगुलिं वातावरण प्रदुषण जूगुलिं सञ्चालन मयाःगु खः । अथे हे यल मनपां नगरयात सफा यायेगु निंतिं गाडी व कर्मचारी नं थप यायेत्यंगु जानकारी वय्कलं बियादीगु दु ।