किपूया ३ वडाय् सितिकं वासः

किपू – किपू नगरपालिकाया ३ नं. वडां कोभिडया ल्वगिपिंत माःगु वासः सितिकं इउँगु दु । कोभिडया हुनिं थ्व वडाय् जक ५ म्हं मयाक मदयेधुंकूगु दुसा वंगु जेठ २३ गतेतक थन वडाय् जक कोभिड संक्रमिततय् ल्याः ४१ म्ह दुगु खः ।

कोभिड ल्वय्या मू लक्षण ज्वर वइगु, छाति स्याइगु (निमोनिया जुइगु) व कथु खसखस जू थें जुइग जूगुलिं थुकियात इलय् हे बिचाःयानाः सिटामोल वासः जक नःसां ल्वय् क्वलाइगु जूगुलिं सिटामोल, भिटामिन सि, भिटामिन ई, जिंक व क्याल्सियम वासः सितिकं इनाब्यगु खः ।

वडाया दुजःपिंसं कोभिड ल्वगिपिंत छेँय् छेँय् वनाः वासः बियाच्वंगु दुसा त्वःफिउपिं सुं दुसा ल्वगिपिंसं वासः कायेत वडाया दुजःपिंत स्वापू तयादीत नं इनाप याःगु दु ।

वडावासीत सुयात नं कोभिडया लक्षण खनेदत धाःसा ल्वय् सुमचुकूसे उघ्रिमय् कोभिड परीक्षण यायेत नं वडां इनाप याःगु दु । कोभिड परीक्षण नं किपू नगरपालिकां सितिकं हे यानाच्वंगु दु ।

थ्वहे दथुइ ३ नं. वडां थःगु वडाय् सुचुपिचु अभियानं नं न्ह्याकूगु दु । लकडाउनया ईयात सदुपयोग यासें वंगु शनिवाः विश्व वातावरण दिवस कुन्हु वडाया समलपार्कय् सिमा पिनाः वातावरण दिवस हंगु खः । लिसें वडाया प्रत्यक लँ सुचुपिचु यायेगु अभियान हे न्ह्याकागु खँ नं वडा ज्याकुथिं धाःगु दु ।